ՊԵՏՔ Է ԱՌԱՎՈՏՅԱՆ և ԵՐԵԿՈՅԱՆ ՄԱՔՐԵԼ ՄԱՇԿԸ
Գիշերը մաշկը վերականգնվում է, և այդ ընթացքում արտադրում է սեբումի ավելորդ քանակություն։ Առավոտյան մաքրման խնդիրը մաշկի մակերեսից ավելորդ ճարպի, մահացած բջիջների և աղտոտվածության հեռացումն է։ Այն նաև մաշկը նախապատրաստում է շիճուկը և խոնավացնող քսուքը տարածելուն։ Երեկոյան քո գլխավոր խնդիրն է հեռացնել դիմահարդարումը, ինչպես նաև հեռացնել աղտոտվածությունը և ողջ օրվա ընթացքում կուտակված ճարպի ավելցուկը։ Դա կկանխարգելի գրգռվածության առաջացումը, ինչպես նաև կկրճատի կնճիռների, տարիքային բծերի առաջացման, ինչպես նաև մաշկի էլաստիկության կորստի ռիսկը։ Հավատա՝ այս գործընթացների կարևորությունը կփաստի արդյունքը։
ՉԻ ԿԱՐԵԼԻ ԴԵՄՔԸ ԼՎԱՆԱԼ ՍՈՎՈՐԱԿԱՆ ՕՃԱՌՈՎ
Սովորական օճառը տարբերվում է բարձր pH-ով, ինչն այն դարձնում է անպիտան՝ դեմքի մաքրման համար։ Ձեռքերը լվանալու օճառը կհեռացնի մաշկի բնական պաշտպանիչ շերտը, կչորացնի այն և կպարգևի ձգված մաշկի ոչ այնքան հաճելի զգացողություններ։
ՊԵՏՔ Է ՕԳՏԱԳՈՐԾԵԼ ՄԱՔՐՈՂ ՄԻՋՈՑ, ՈՐԸ ՀԱՐՄԱՐ Է ՔՈ ՄԱՇԿԻ ՏԻՊԻՆ
Մաքրող միջոցն ընտրիր՝ ելնելով քո մաշկի տիպից և դրա պահանջներից, քանի որ գոյություն չունի մի այնպիսի միջոց, որը հարմար է բոլորին։ Մաքրող կաթիկն ունի հագեցած քսուքային բաղադրություն և լվացվելիս չի փրփրում։ Այն հարմար է չոր կամ հասուն մաշկին։ Լվացվելու գելը մաքրում և փափկացնում է մաշկը։ Այն հարմար է նորմալ կամ յուղոտ մաշկի համար։
ՉԻ ԿԱՐԵԼԻ ՕԳՏԱԳՈՐԾԵԼ ՄԻՋՈՑ, ՈՐԸ ԹՈՂՆՈՒՄ Է ՁԳՎԱԾՈՒԹՅԱՆ ԶԳԱՑՈՂՈՒԹՅՈՒՆ
Եթե լվացվելուց հետո մաշկն ունենում է ձգվածության զգացողություն, ապա ամենայն հավանականությամբ, մաքրող միջոցը չափազանց ագրեսիվ է քո մաշկի համար և քայքայում է մաշկիդ պաշտպանիչ շերտը։ Սովորաբար, նման միջոցներն ընտրում են մաշկի յուղոտ տիպ ունեցող կանայք, սակայն դա սխալ է, քանի որ այդ կերպ միայն խթանում են մաշկի ճարպի հավելյալ արտադրությունը։
ՊԵՏՔ Է ՕԳՏԱԳՈՐԾԵԼ ՄԱՇԿԸ ՄԱՔՐՈՂ ԳՈՐԾԻՔ
Մաքրման գործիքը ամենօրյա խնամքի գործընթացի հաջորդ մակարդակն է։ Մաքրող միջոցը տարածիր մաքրող սարքի խոզանակին և մեկ րոպե շարունակ մերսի՛ր դեմքի մաշկը։ Սա կօգնի հեռացնել աղտոտվածությունը, դիմահարդարման մնացորդները, մահացած բջիջները, ինչպես նաև կմաքրի ծակոտիները։ Բացի այդ, խթանող էֆեկտը մաշկին հաղորդում է առողջ փայլ։
ՉԻ ԿԱՐԵԼԻ ՄԱՔՐՈՂ ՄԻՋՈՑԻ ԸՆՏՐՈՒԹՅՈՒՆԸ ԿԱՏԱՐԵԼ՝ ԸՍՏ ԳՆԻ
Դու, իհարկե, նկատել ես, որ տարբեր ապրանքանիշերի միջոցների գները կարող են էականորեն տարբերվել։ Գիտական հետազոտություններ, կլինիկական հետազոտություններ, թանկարժեք բաղադրիչներ՝ այս բոլորն, անխոս, անդրադառնում են արժեքի վրա։ Մենք խորհուրդ ենք տալիս սկսել մաշկի տիպը և դրա իրական պահանջները հասկանալուց։ Դա պետք է լինի խնամքի կատարյալ միջոցը ընտրելու հիմք։
ՊԵՏՔ Է ՕԳՏԱԳՈՐԾԵԼ ՏՈՆԻԿ
Մաքրման գործընթացի երկրորդ քայլը տոնիկն է։ Այն հեռացնում է աղտոտվածությունը, որը մնացել է սովորական մաքրող միջոցի կիրառումից հետո, շնորհիվ առավել խորը մաքրման՝ փոքրացնում է ծակոտիները, կարգավորում է մաշկի pH-հաշվեկշիռը և նախապատրաստում է շիճուկը կամ քսուքը կիրառելուն։ Տոնիկը մաշկին տարածելու համար քեզ անհրաժեշտ է բամբակե սկավառակ կամ անձեռոցիկ։
ՉԻ ԿԱՐԵԼԻ ԼՎԱՑՎԵԼ ՏԱՔ ՋՐՈՎ
Որքան էլ դա հաճելի է, չի կարելի լվացվել տաք ջրով։ Այն չորացնում է մաշկը։ Այդ պատճառով էլ լվացվելու քո ընտրությունը սենյակային ջերմաստիճանի ջուրն է։
