Ի՞նչ եք կարծում, ի՞նչ է իրական հոգածությունը սեփական անձի մասին:
Ինձ համար դա ինքն իր հետ լիարժեք հաղորդակցվելն է, սեփական հոգեկան ու զգացմունքային վիճակը նրբորեն զգալու և այն հավասարակշված պահելու կարողությունը: Այո, սերն ինքդ քո հանդեպ ենթադրում է մի փոքր առողջ էգոիզմի առկայություն, սակայն դա երբեմն լավ ինքնազգացողություն պահպանելու միակ միջոցն է:
Առաջին անգամ ես ինքն իր մասին հոգ տանելու կարևորությունը հասկացա դեռ դպրոցում, երբ 15 տարեկանում դժվար ժամանակներ սկսվեցին: Այդ պահից սկսած ինքս իմ մասին հոգ տանելն իմ կյանքի կարևոր մասն է: Ժամանակին ես շատ զգացմունքային էի արձագանքում ճգնաժամերին, սակայն հիմա արդեն սովորել եմ գործել պրոակտիվ ձևով և դիմակայել հարվածին: Այժմ ես ոչ միայն կրում եմ ամբողջ պատասխանատվությունն իմ ինքնազգացողության համար, այլ նաև օգնում եմ ուրիշներին՝ գտնելու անձնական ներդաշնակության ուղին:
Ինչպե՞ս ճիշտ հանգստանալ:
Ժամանակակից աշխարհում մեր ուղեղը մշտապես ինչ-որ բանով զբաղված է: Այն անընդհատ մշակում է ստացվող տեղեկությունների հսկայական հոսքերը և չափազանց լարված է: Թույլ տվեք, որ այն հանգստանա արտաքին ազդակներից: Դա կօգնի հայացք գցել գիտակցության խորքերն ու գտնել բոլոր հարցերի պատասխանները:
Իրական վերբեռնման համար պարտադիր չէ մեկ շաբաթ արձակուրդ վերցնել և տեղափոխվել երկրագնդի մյուս ծայրը՝ օվկիանոսի ափին յոգայի ասանաներ անելու համար (հարևան փողոցի վրա գտնվող յոգա-կենտրոնը նույն արդյունքը կտա): Ավելին, ինքնին յոգան ընդամենը գործիք է: Պետք է մի պահ դադար վերցնել առօրյա հոգսերից և դուրս գալ առօրյա շրջապտույտից, որը սթրես է առաջացնում: Հարմարավետ տեղավորվել բազմոցի մեջ՝ լավ գիրքը ձեռքին, զբոսնել անտառով: Նույնիսկ 10 րոպե լռությունն ու մեկ բաժակ սուրճը կօգնեն թուլանալ և կբերեն թարմ գաղափարներ:
Եթե դուք ամբողջովին ընդունում եք ինքներդ ձեզ, սիրով վերաբերվում ձեր մարմնին և հոգուն, լիքն եք էներգիայով, դա անհավանական ուժ է հաղորդում և օգնում է ավելի լավ կատարել կնոջ, մոր և գործարար կնոջ դերերը: Վերբեռնման օրեր կազմակերպեք գոնե շաբաթը մեկ անգամ և վայելեք փոփոխությունները:
7 գաղափար՝ արագ վերբեռնման համար
Եթե հոգնածություն ես զգում, ունես վատ տրամադրություն, անելիքների ծավալուն ցանկ, և ընդամենը կես ժամ՝ էներգիայով լիցքավորվելու և մինչև օրվա վերջը բարձունքում մնալու համար... Ի՞նչ կարելի է անել:
1. Կարդա՛ սիրածդ գիրքը: Հարմար տեղավորվի՛ր բազկաթոռին, ծածկի՛ր ոտքերդ որևէ տաք ծածկոցով, տաք թեյ պատրաստի՛ր և ըմպիր՝ ինչ-որ համեղ բանի հետ:
2. Անջատիր առաստաղի լույսերը: Վառի՛ր մոմեր և նստի՛ր լռության մեջ: Կենտրոնացի՛ր շնչառությանդ վրա, աշխատիր չմտածել գործերի ու հոգսերի մասին: Հիշիր ինչ-որ հաճելի բան, ընկղմվիր երազանքների կամ հիշողությունների մեջ:
3. Հագի՛ր սպորտային կոշիկներդ ու գնա՛ զբոսնելու: Թարմ օդում կես ժամ անկացնելը կօգնի առույգանալ և վերբեռնել գիտակցությունը: Թույլատրելի է թխվածքով սուրճ վայելելու համար հարևան սրճարան մտնելը:
4. Նայի՛ր շուրջդ՝ արդյո՞ք հարմարավետ է քո տարածքում: Թեթև մաքրություն արա, մտածիր՝ արդյոք սփռոցը կամ վարագույրը փոխելու ժամանակը չէ՞: Նայիր կահույքի խանութների կայքերը:
5. Պատրաստի՛ր սիրածդ ուտեստը, ցանկալի է՝ առողջ սնունդ: Անշտապ վայելիր դրա համը, մի կողմ դիր հեռախոսը, անջատիր հեռուստացույցը:
6. Դեմքիդ կամ մազերիդ համար դիմակ պատրաստիր, թարմացրո՛ւ մանիկյուրը:
7. Երազի՛ր: Ո՞ւր կուզեիր գնալ: Ի՞նչ վայրեր կուզեիր տեսնել: Իսկ գուցե, վաղուց որևէ նախասիրության գաղափա՞ր է հասունացել: Ցանկ կազմի՛ր և այն կախի՛ր տեսանելի վայրում: Երազանքները պե՛տք է իրագործվեն:
