Մեծացրո՛ւ գիտակցվածությունը
Նույնիսկ ամենածանրաբեռնված օրվա ընթացքում գտի՛ր մի քանի րոպե դանդաղ շարժման և պահը զգալու համար: Երբ նախաճաշում ես, վայելի՛ր սիրածդ ուտեստը: Ի՞նչ ես տեսնում շուրջդ: Լսո՞ւմ ես թռչունների երգը կամ ծառերի շրշյունը պատուհանից այն կողմ: Կենտրոնացումը շրջապատող աշխարհի գեղեցկության, այլ ոչ թե սեփական ապրումների վրա, գերծանրաբեռնված աշխատելու գաղտնիքն է:
Մի՛ շտապիր առավոտյան
«Եվս 5 րոպե», – դու նորից ու նորից փոխում ես զարթուցիչի ժամը, իսկ հետո վերջին րոպեին վեր թռչում և սկսում վազվզել բնակարանով՝ մաքուր հագուստի, սննդի ու բանալիների որոնումներում: Տրամադրություն ստեղծի՛ր: Մի փոքր ավելի վաղ արթնացիր, համեղ նախաճաշ պատրաստիր, խնամիր մաշկդ, ընտրիր, թե ինչ տեսք ես ուզում ունենալ: Օրդ սկսիր հանգիստ ռիթմի մեջ, և քեզ կհաջողվի պահպանել հանգստությունը մինչև երեկո:
Սիրի՛ր ջուրը
Պարզ և ձանձրալի է հնչում, սակայն բավականաչափ ջուր խմելու սովորույթը էներգիան ավելացնելու և կյանքի որակը բարձրացնելու արդյունավետ միջոցներից մեկն է: Եթե վաղուց ցանկանում ես անցնել առողջ ապրելակերպի, սկսի՛ր ջրից: Խմի՛ր մեկ-երկու բաժակ առավոտյան, երբ ջրազրկված ես երկարատև քնից հետո, և պայուսակիդ մեջ մշտապես ջրով լի փոքրիկ շիշ ունեցիր:
Փորձի՛ր նորը
Երբ կյանքում «պետք է»-ները չափազանց շատ են, և գրեթե չունես սեփական «ուզում եմ»-ները, հեշտությամբ կարող ես կորցնել մոտիվացիան և անտարբեր դառնալ: Զբաղվի՛ր երազանքիդ հոբբիով, եթե նույնիսկ այն անօգուտ կամ տարօրինակ է թվում: Վարպետության դասեր կավագործության ոլորտո՞ւմ: Իհարկե՛: Գրանցի՛ր անելիքներիդ ցանկում աշխատանքային խնդիրների հետ միասին և գործի՛ր:
Սովորի՛ր ասել «ոչ»
Տաք լոգանք, շոկոլադ և սիրված սերիալը՝ ամեն ինչ պատրաստ է լարված շաբաթվա վերջում հանգիստ երեկո վայելելու համար... Դու չափազանց հոգնած ես տնից դուրս գալու համար, իսկ ընկերուհիդ հրավիրում է գեղեցիկ երեկույթի, մայրդ էլ խնդրում է օգնել իրեն ամառանոցո՞ւմ: Մի՛ հանձնվիր: Թույլ տուր ինքդ քեզ հանգստանալ, և մի՛ համաձայնիր քաղաքավարության կամ պարտքի զգացումից ելնելով: Դու պետք է վերականգնես ուժերդ ինքնուրույն, մյուսներին լավ տրամադրություն նվիրելու համար:
