1. ԸՆՏՐԻ՛Ր ՖՈՐՄԱՏԸ
Անցի՛ր հավելված և վերին ձախ անկյունում կգտնես «Քո պատմությունը» / Your story կոճակը: Դրա օգնությամբ կարող ես հրապարակել նկարներ, հոլովակներ, տեքստեր և ուղիղ միացումներ: Ուզում ես արագ ինչ-որ լավ նկա՞ր հրապարակել, ցույց տալ, թե որտե՞ղ ես և ի՞նչ ես անում, կամ փոքրիկ դասախոսություն անցկացնել, հայտնել կարծիքդ ու արագ արձագա՞նք ստանալ: Ընտրի՛ր այն ֆորմատը, որն ամենահարմարն է քո նպատակների համար: Այն ամենն, ինչ տեղադրում ես Stories-ում, անհետանում է 24 ժամ անց, սակայն միշտ էլ կարող ես պահպանել հրապարակումդ «Արդիական»/Highlights հատվածում:
2. ՍՏԵՂԾԱԳՈՐԾԱԲԱՐ ՄՈՏԵՑԻՐ
Stories-ում նկարներն ու վիդեոները չեն պահանջում այնպիսի մշակում, ինչպիսին էջի հիմնական հրապարակումները, պարտադիր չէ, որ դրանք նույն երանգների և ոճի մեջ լինեն: Փորձի՛ր տարբեր ֆիլտրեր և հատուկ էֆեկտներ. այդպես նույնիսկ ավելի զվարճալի է, չէ՞ որ սահմանափակումներ չկան: Տեքստեր, սթիքերներ, իմոջիներ, պատկերներ ու հեշթեգներ ավելացրու պատրաստի նկարի կամ վիդեոյի վրա. բոլոր այս գործիքները կարող ես գտնել էկրանի վերին աջ անկյունում: Հատուկ էֆեկտները կօգնեն ավելի ստեղծարար հոլովակ ստանալ: Օրինակ՝ BOOMERANG ռեժիմը կարճ հոլովակներ է ստեղծում՝ դրանք անընդհատ ետ ու առաջ տանելով: «SUPERZOOM»-ը կօգնի դրամատիկ էֆեկտ ստանալ՝ մոտեցնելով օբյեկտը տարբեր հնչյունների ներքո: «REWIND»-ը վիդեոն ցուցադրում է հակառակ ուղղությամբ, իսկ «HANDS-FREE»-ն թույլ է տալիս վիդեո նկարել առանց նկարելու կոճակը սեղմած պահելու:
3. ԱՐԴՅՈՒՆՔ ՍՏԱՑԻՐ
Stories-ը կենդանի, դինամիկ կոնտենտ է, որի օգնությամբ դու կարող ես և՛ շփվել քո լսարանի հետ, և՛ վայրկենապես արդյունք ստանալ՝ դիտումների քանակության տեսքով, և՛ զարգացնել քո անձնական ապրանքանիշը: Ցո՛ւյց տուր բիզնեսի «խոհանոցը». այդպես հետևորդներն ավելի հավատարիմ կդառնան, իսկ դու ավելի մոտ կլինես նրանց:
