Ցիրկադային ի՞նչ...
Ցիրկադային ռիթմերը կենսառիթմեր են, որոնք կարգավորում են մեր օրգանիզմի բոլոր գործընթացները՝ հորմոնային բալանսը, սննդային սովորույթները, մարմնի ջերմաստիճանը, նյութափոխանակությունը, քնից արթնության անցումը: Եթե դու չես կարողանում քնել նույնիսկ ակտիվ օրվա վերջում, նշանակում է՝ քո ցիրկադային ռիթմերը խախտված են և ազդել են մելատոնինի արտադրության վրա:
Ո՞րն է ամուր քնի գլխավոր թշնամին
-Եվս մեկ սերիա ու քնում եմ...: Ասում ես ինքդ քեզ, փոխարենը մինչև ուշ գիշեր նայում ես սիրելի սերիալը: Մինչդեռ օրգանիզմիդ կենսառիթմն արդեն խախտվում է էկրանային լույսից, և օրգանիզմդ չի հասկանում, թե երբ պետք է նախապատրաստվել քնին՝ դանդաղեցնելով ֆիզիկական գործընթացները: Իմաստուն բնությունը մեր ներքին ռիթմերը կարգավորել է ցերեկային լույսի ժամանակ ակտիվ լինելուն և գիշերային հանգստին, սակայն էլեկտրականության և շարժական սարքավորումների հետ ամեն ինչ փոխվել է: Չկա մթություն՝ չկա մելատոնինի արտադրություն, որը պատասխանատու է քնի և հոգնածության զգացման համար:
Ինչպե՞ս է դա ազդում մեր առողջության վրա
Երեկոյան արհեստական լույսը և քնի ռեժիմի բացակայությունը երկարաժամկետ հեռանկարում հանգեցնում են ճարպակալման, սրտանոթային հիվանդությունների, գրգռվածության, ապաթիայի, ուշադրության կենտրոնացման նվազման, հիշողության վատացման: Այս ամենը հնարավոր է կանխարգելել ընդամենը սեփական կենսակերպը փոխելով:
Ի՞նչ կարող ես անել
1. Պառկի՛ր քնելու ամեն օր միևնույն ժամին: Օրգանիզմդ աստիճանաբար կսովորի և ինքն էլ կսկսի որոշակի ժամին տրամադրվել ամուր քնի:
2. Հրաժարվի՛ր սարքերից առնվազն քնից մեկ-երկու ժամ առաջ, կամ դրանք դիր գիշերային ռեժիմի վրա, որը լույսը կդարձնի փափուկ և դեղնավուն: Համակարգչի առաջ աշխատելու համար հատուկ ակնոցներ կրիր, որոնք արգելափակում են կապույտ լույսը՝ հենց դա է խախտում մելատոնինի արտադրությանը:
3. Ցերեկը հաճախ փողոց դուրս արի, որպեսզի օրգանիզմդ կարգավորի իր ներքին ժամացույցը բնական լուսավորությամբ:
4. Դիմավորի՛ր լուսաբացներն ու ճանապարհի՛ր մայրամուտները, այդպես դու կօգնես, որ օրգանիզմդ վերբեռնի իր թայմերը: Դա նաև անհավանական գեղեցիկ ու ռոմանտիկ է, հատկապես՝ ամռանը:
