Հենց սթրեսը կարող է դառնալ մաշկի գրգռվածության, խամրած գույնի և նույնիսկ կնճիռների առաջացման պատճառ: Դու կարող ես տարածել երանգային հիմք, քողարկիչ, շատ ջուր խմել և նույնիսկ չնայել ֆասթֆուդի կողմը, բայց իրավիճակը չի փոխվի:
ԻՆՉՊԵ՞Ս Է ՍԹՐԵՍՆ ԱԶԴՈՒՄ ՄԱՇԿԻ ՎՐԱ
Գլխավոր մեղավորը կորտիզոլն է: Երբ սթրեսի ենք ենթարկվում, մարմինը մտածում է, որ վտանգի մեջ է գտնվում և արձագանքում է կորտիզոլ հորմոնի արտադրությամբ: Առաջին հայացքից ոչ մի սարսափելի բան, սակայն ժամանակի ընթացքում կորտիզոլն ազդում է ճարպագեղձերի աշխատանքի վրա, որոնք սկսում են ավելի շատ սեբում արտադրել: Սա էլ իր հերթին կարող է դառնալ պզուկների պատճառ, օրինակ՝ շատ կարևոր իրադարձությունից առաջ՝ քննություն, խորհրդակցություն կամ հանդիպում: Երկարատև սթրեսը հանգեցնում է ոչ միայն սեբումի արտադրության ավելացման, այլև վատթարացնում է մաշկի վերականգնման գործընթացը, բացասաբար է ազդում կոլագենի և էլաստինի արտադրության վրա և նույնիսկ նպաստում է դիմախաղի ու խորը կնճիռների առաջացմանը: Բացի այդ, սթրեսն ազդում է մաշկի պաշտպանիչ գործառույթի վրա և այն դարձնում ավելի խոցելի՝ շրջակա միջավայրի բացասական ազդեցության դեմ:
ԵՎ Ի՞ՆՉ ԱՆԵԼ
Բարեբախտաբար իրավիճակը շտկելու հնարավորություն կա: Նախ, գտնել սթրեսի պատճառը: Ապա, մտածել՝ ինչպես կարելի է ազատվել դրանից: Մեդիտացիա, յոգա, շնչառություն. այս և այլ մեթոդները կօգնեն կարգավորել իրավիճակը: Վառի՛ր մոմերը, տարածի՛ր դիմակ և պառկիր տաք ջրով լոգարանակոնքի մեջ: Մի քիչ ժամանակ գտիր քեզ համար և սովորի՛ր հանգստանալ:
