«Վեց տարի առաջ ես եկա Օրիֆլեյմ ամառային ստաժավորման, այն հաջողությամբ անցնելուց հետո ինձ վերցրեցին մշտական աշխատանքի: Ես երազում էի աշխատել միջազգային ընկերությունում, և այդ երազանքն իրականացավ: Օրիֆլեյմում ես զբաղվում էի հաճախորդների սպասարկման զարգացմամբ, կոորդինացնում էի միջազգային ծրագրեր և աշխատում վաճառքների ու բիզնեսի աջակցության բաժնում: Ես ուղղակի պաշտում էի իմ աշխատանքը, սակայն սթրեսը շատ էր՝ հատկապես ճգնաժամային շրջանում: Հանկարծ ես հասկացա, որ պետք է ինչ-որ բան փոխել: Կայնքն այլևս այդքան ուրախ չէր, ինչպես նախորդ երեք տարիները: Եվ ես որոշեցի: 2017 թ. հուլիսի 5-ին բոլորեց ուղիղ 2 տարին՝ ինչ ես լքել եմ Մոսկվան»:
«Ես միշտ երազել եմ շատ ճանապարհորդել, աշխատանքին զուգահեռ ճամփորդել եմ բազում երկրներ: Եվ երբ հայտնվեց Թայլանդ մեկնելու հնարավորություն, այդպես էլ արեցի: Մեկ օրում՝ ի զարմանս ինձ և գործընկերներիս, ես որոշեցի դուրս գալ աշխատանքից և երկու շաբաթ անց մեկնեցի: Անցել է արդեն երկու տարի, և ես հասկանում եմ, որ դա լավագույն որոշումն էր՝ փոխել կյանքը և ապրել երազանքով: Այժմ իմ կենսակերպն այնպիսին է, որ ինձ թույլ է տալիս ազատ տեղաշարժվել, իրագործել իմ ճամփորդական երազանքները և զարգանալ: Անել այն, ինչ դուր է գալիս, ինչը լիցքավորում է և կյանքը դարձնում ավելի վառ»:
- Պատմիր մի փոքր որոշումդ ընդունելու մասին, ինչպե՞ս դա քեզ տրվեց:
- Ես մտածում էի, որ իմ ուղևորությունը դեպի Թայլանդ շատ ռիսկային է: Հասկանում էի, որ կարող է ստացվել, կարող է չստացվել: Ես գնացի առաջ՝ դեպի անհայտը, և ինձ մոտ ստացվեց: Որոշ դժվարություններից հետո ամեն ինչ ստացվեց: Իմ կարիերան բավականին հաջող էր զարգանում, ես չէի մտածում Օրիֆլեյմից հեռանալու մասին, սակայն հետագայում հասկացա. կլինի այն, ինչ պետք է լինի: Չփորձելու դեպքում կփոշմանես չկատարածի համար, այլ ոչ թե կատարածի: Այդ պատճառով էլ միշտ փորձում եմ:
- Ինչո՞ւ Ասիա, այլ ոչ Ամերիկա
- Ասիան ինձ դուր է գալիս եղանակի, գեղեցկության առումներով և կոլորիտով: Ինձ դուր են գալիս մարդիկ, մտածելակերպը և իրենց արժեքները: Ասիայում կենսամակարդակը այնքան էլ բարձր չէ, իսկ մարդիկ գնահատում են այն, ինչ ունեն: Ես շատ էի եղել Ասիայում և գիտեի՝ ուր էի գնում: Ժամանելով Թայլանդ՝ ես պարզեցի, որ հեշտությամբ կարող եմ դասավանդել դպրոցում՝ որպես անգլերենի ուսուցչուհի: Այդպես ես ստացա իմ նոր մասնագիտությունը:
Տեղի դպրոցում աշխատեցի մեկ կիսամյակ, սակայն ինձ մոտ առաջացավ երկիրը փոխելու ցանկություն: Թայլանդը լիցքաթափում է, դու այլևս չես ուզում լարվել: Այնտեղ էլ ես ծանոթացա Նատաշայի հետ, մենք դարձանք լավ ընկերներ, միասին նստում էինք խոհանոցում և ընտրում՝ որ երկրներ ճամփորդել: Որոշեցինք, որ երկուսս էլ չենք եղել Չինաստանում, հարց ու փորձ արեցինք՝ ինչ և ինչպես, գնեցինք տոմսերը, ստացանք վիզաներն ու մեկնեցինք: Ես սիրում եմ բացահայտել նորը, ծանոթանալ նոր մարդկանց հետ, ինձ համար կարևոր է մշակույթին ծանոթանալ ներսից: Երբ դու պարզապես ճամփորդում ես, դու խորապես «չես զգում» երկիրը, ինչպես, օրինակ՝ տվյալ երկրում ապրելու և տեղի մարդկանց հետ աշխատելու դեպքում:
- Որքա՞ն ժամանակ անցավ սեփական ծրագիրը ստեղծելու երազանքից մինչև հիմա, որտե՞ղ եք կազմակերպում հեղինակային ճամփորդությունները: Դուք ինքնե՞րդ եք ստեղծել կայքը, թե՞ ներգրավել եք այլ մարդկանց:
- Այդ երազանքն ինձ մոտ վաղուց էր: Անգամ երբ արդեն աշխատում էի Օրիֆլեյմում, ես հասկացա, որ սիրում եմ ճամփորդել և կուզենայի զարգանալ այդ բնագավառում: Ընկերուհուս հետ եկանք համաձայնության, դա հետաքրքիր էր երկուսիս համար: Առաջին փորձն անհաջող էր. մենք ստեղծել էինք մեկ էջ ունեցող կայք, սակայն խումբ հավաքելը չհաջողվեց: Գաղափարը չթողեցինք: Ես կարծում եմ, որ պետք է անընդհատ փորձել՝ մինչև արդյունքի հասնես: Եվ Չինաստանում մենք որոշեցինք, որ կշարունակենք աշխատել: Մենք մշակեցինք չորս ուղղություն այն երկրներով, որտեղ արդեն բազմիցս եղել էինք և կարող ենք հավուր պատշաճի ներկայացնել այդ երկրներն այնպես, որ մարդիկ նույնպես սիրահարվեն այդ երկրներին:
- Դրանք ո՞ր երկրներն են:
- Մեր երեք ճամփորդությունները սկսվում են Հոնկոնգում. Հոնկոնգ – Մակաո – Հյուսիսային Վիետնամ, Հոնկոնգ – Մակաո – Ֆիլիպիններ, Չինաստան – Թայլանդ, Մալազիա: Հիմնական ձևաչափը՝ ճամփորդություն, որը առավելագույնս ցույց կտա երկիրն ու մշակույթը: Մենք տեղափոխվելու ենք, սնվելու, զվարճանալու և ծանոթանալու ենք՝ ինչպես տեղի բնակիչները: Մի խոսքով, ցույց կտանք վայրեր, որոնք դժվար է տեսնել, երբ ճամփորդում ես սովորական տուր-օպերատորի օգնությամբ:
Մենք փորձում ենք անել բարի գործեր, քանի որ կարծում ենք, որ մենք ոչ միայն սպառողներ ենք: Մենք պետք է փոխարենը որևէ բան տանք տեղացիներին: Մենք ստեղծեցինք կայք, հրավիրեցինք դիզայներ-ֆրիլանսեր, հիմա գտնվում ենք գովազդի և մարդկանց գրավելու փուլում: Մենք բավականաչափ ծանոթ ենք այդ երկրներին՝ դրանք մարդկանց ցույց տալու համար, որպեսզի նրանք առավելագույնս վայելեն հույզերն ու տպավորությունները:
- Պատմեք՝ ինչպե՞ս եք աշխատում սոցիալական կայքերում: Որևէ հմտություն սովորե՞լ ես կամ գուցե ընթերցել:
- Մեր արտադրանքը դժվար է վաճառել սառը շուկայում: Բայց և այնպես մարդիկ ուզում են մեզ հետ ճամփորդել, քանի որ դա հետաքրքիր է, մենք ցույց ենք տալիս երկիրն ավելի լավ, քան սովորական ճամփորդական տուրով կազմակերպիչը: Անխոս, այստեղ պետք է տարածել սեփական ապրանքանիշը: Այս պահին ես անցնում եմ բազմաթիվ կուրսեր՝ սոց. կայքերում էջեր վարելու թեմայով: Կարդում և դիտում եմ՝ ինչպես են զարգանում այլ բիզնեսները, փորձում եմ յուրացնել լավագույնը և օգտագործել այդ փորձը մեր ոլորտում:
- Գլխավոր կայքերը Ֆեյսբուքն ու Ինստագրա՞ն են:
- Իրականում, այժմ դա միայն մեր անձնական էջերն են @spadack: Մենք աշխատում ենք ընկերության՝ @travelnowornever հաշվի վրա, այստեղ մեծ է գործունեության դաշտը: Սոց. ցանցերից մեզ մոտ շատ են գալիս մարդիկ, քանի որ հասկանում են՝ ինչ ենք ներկայացնում մենք, ինչ ակնկալել:
- Կարո՞ղ ես խորհուրդ տալ բիզնես վարելու գրքեր: Առհասարակ, արդյո՞ք դրանք անհրաժեշտ են:
- Անկասկած, բիզնեսի, մարքեթինգի և ինքնազարգացման վերաբերյալ գրքերն անհրաժեշտ են սեփական ուժերին հավատալու համար: Չէ՞ որ նոր բան սկսելիս ունենում ես վախեր, և նմանօրինակ գրականությունը օգնում է կենտրոնանալ ու շարժվել առաջ: Իմ սիրված 3 գրքերը հետևյալն են՝ «Հաճախորդներ ամբողջ կյանքի համար» (Կառլ Սյուելլ և Պոլ Բրաուն), «Կապույտ օվկիանոսի մարտավարությունը» (Կիմ Չան և Ռենե Մոբորն) և Բարբարա Շերի գրքերը, դրանք շատ են ոգեշնչում:
- Դու ունեցել ես մեծ կորպորացիաներում աշխատելու և հաջողակ կարիերա կառուցելու փորձ: Այժմ անհատ ձեռներեց ես և ապրում ես այնպես, ինչպես վաղուց էիր երազում: Ի՞նչ կարող ես խորհուրդ տալ մարդկանց՝ փոփոխություններին ընդառաջ գնալու համար:
- Ես կարծում եմ, որ նախ և առաջ պետք է հասկանալ՝ որոնք են քո կյանքի արժեքները, ինչն է քեզ համար իրոք կարևոր: Ամեն անգամ որևէ բան անելիս անպայման հարցրու ինքդ քեզ՝ արդյո՞ք դա քեզ համար կարևոր է: Եթե հասկանում ես, որ անում ես քեզ համար ոչ կարևոր բան, որը քեզ չի երջանկացնում, ապա պետք է որևէ բան փոխել: Ուղղակի փորձիր մտածել անհաջողությունից քեզ ապահովագրող մի բան, եթե հանկարծ մտածածդ չստացվի: Խիզախիր և արա այն, ինչ ուզում ես: Նկարիր քո երազանքի վառ ու հստակ պատկերը՝ ուր ես դու շարժվում, ինչն է քեզ ոգեշնչում խնդիրների, դժվարությունների դեպքում, եթե հանկարծ մտքովդ կանցնի թողնել այդ ամենը: Քո արժեքների հիման վրա կազմած այս պատկերը քեզ կոգեշնչի, կմոտիվացնի և կհաղորդի անհրաժեշտ էներգիա՝ նոր ձեռքբերումների համար: Եվ, անկասկած, ծրագրերն ու նպատակները նույնպես շատ կարևոր են: Պետք չէ վախենալ: Դա բավականին բարդ է, սակայն պետք է ծրագրել ամեն ինչ, շարժվել փոքրիկ քայլերով, գործել ամեն օր, հենց այդ դեպքում էլ կլինի արդյունք: Կարևոր է գալ ներքին համաձայնության. եթե սարսափում ես, հոգ չէ, վախեցիր առավելագույնը 20 րոպե, այնուհետև պետք է հավաքվել և շարժվել առաջ:
