1. ԱՐԱ ԱՎԵԼԻՆ, ՔԱՆ ՔՈ ՊԱՇՏՈՆԱԿԱՆ ՊԱՐՏԱԿԱՆՈՒԹՅՈՒՆՆԵՐՆ ԵՆ
Երբեք մի ասա. «Դա իմ գործը չէ»: Միշտ ուղիներ փնտրիր աշխատանքն ավելի արդյունավետ ու օգտակար դարձնելու համար: Այդպես դու նոր հմտություններ ես սովորում, ավելացնում ես ազդեցության ոլորտն ու դառնում ես ավելի արժեքավոր աշխատակից:
2. ՀԱԳՈՒՍՏԴ ՄՏԱԾՎԱԾ ԸՆՏՐԻՐ
Վատ նորություն. մարդիկ քեզ գնահատում են առաջին չորս վայրկյանի ընթացքում: Հաջորդ երեսուն վայրկյաններում նրանք որոշում են ընդունում: Լավ նորություն. տպավորություն գործելու համար բավական է արտաքին տեսքը: Թարմ դիմահարդարում, գեղեցիկ, գործնական հագուկապ. ու վերջ: Ոգեշնչումը չի՞ հերիքում: Նայի՛ր, թե ինչպես են հագնվում քո ոլորտի հաջողակ մարդիկ: Կլինի դա խիստ գործնական ոճ կամ նրբաճաշակ քեժուալ, դու ես ընտրում: Այո, մենք առաջարկում ենք կրկնօրինակել հաջողակ լուծումները (սակայն դա պետք է անել հարգանքով): Որքան քեզ վստահ զգաս, այնքան լավ: Այդ փոփոխությունները կնկատվեն, և հաշվի առնելով հոյակապ նորամուծությունները՝ դու կդառնաս պաշտոնի բարձրացմանն արժանի լավագույն թեկնածուն:
3. ՍՈՎՈՐԻՐ ՆՈՐԸ
Կերպարի հետ ամեն ինչ պարզ է, սակայն առանց գիտելիքների հեռու չես գնա: Եթե ընկերությունը սովորելու, կոնֆերանսների մասնակցելու հնարավորություն է տալիս, վճարում է դասընթացների կամ թրեյնինգների համար, 100% օգտվիր դրանից: Ամեն ինչ արա՝ քո ոլորտում այնպիսի փորձագետ դառնալու համար, որին դիմում են բոլորը խորհուրդ ստանալու համար: Գրի՛ր հոդվածներ պրոֆեսիոնալ հրատարակությունների համար, վարպետության դասեր տուր, քո հմտությունները մյուսներին սովորեցրու. այս կերպ դու քեզ ու քո ընկերությունը բարձր մակարդակով ես ներկայացնում:
4. ՇՓՎԻ՛Ր ՄԱՐԴԿԱՆՑ ՀԵՏ
Մարդկանց հետ շփումը, ճկուն լինելը, սակայն հետաքրքրությունները պաշտպանելը երևի ամենակարևոր հմտությունն է: Եթե ընկերությունում կա կորպորատիվ մշակույթ, հասկացի՛ր, թե ինչի վրա ավելի լավ կլինի կենտրոնանալ, բացի աշխատանքը լավ կատարելուց: Կարողանում ես հոյակապ շփվել մարդկանց հետ և հարաբերություննե՞ր կառուցել, հավատարմորեն ես վերաբերում ապրանքանիշին և հստակորեն կառուցում ես գործընթացնե՞րը: Դու պաշտոնի բարձրացմանն արժանի առաջին թեկնածուն ես:
5. ՕԳՆԻ՛Ր ՂԵԿԱՎԱՐԻԴ
Եթե ուզում ես, որ բարդ իրավիճակներում քո ղեկավարն օգնի քեզ, նաև դո՛ւ օգնիր նրան: Աշխատանքդ ժամանակին կատարիր, հասիր նշված արդյունքներին, եղիր ուժեղ թիմային խաղացող և մի՛ դավիր թիմիդ: Այդ կերպ ոչ միայն միավորներ ես հավաքում քո օգտին, այլև բարձրացնում ես քո արժեքը՝ որպես աշխատակից: Եվ եթե հորիզոնում առաջխաղացման հնարավորություն է նշմարվում, քո ղեկավարը ավելի հավատարիմ կլինի քեզ: Իսկ եթե նրան բարձրացնեն, նա քեզ կվերցնի իր թիմ:
6. ՄԻ ՎԱԽԵՑԻՐ ՎԻՃԵԼ
Իհարկե շատ ավելի լավ է, երբ ամեն ինչ բնական կերպով է տեղի ունենում, քո աշխատանքը գնահատում են և պաշտոնդ բարձրացնում: Սակայն լինում է, որ առաջխաղացման համար ջանքեր են պահանջվում: Պատրաստիր ցանկ, թե ինչ ես կարողացել անել աշխատանքիդ ընթացքում. ձեռքբերումներ, ձեռնարկումներ, առաջարկներ: Եթե թվերի հետ ես աշխատում, վիճակագրություն հավաքիր: Անցել ես մի քանի կուրս և սովորել ես նոր բաներ նախորդ տարվա ընթացքում: Պատրաստվիր պատմել այդ մասին: Տեղեկացի՛ր ընկերությունում թափուր տեղերի մասին և թարմացրու ինքնակենսագրականդ՝ ըստ պահանջների: Սակայն ամեն ինչ միանգամից մի թափիր ղեկավարության վրա: Սպասիր հարմար առիթի, երբ գա ժամանակը, պատրաստ եղիր պատմել, թե ինչու ես հատկապես դու արժանի պաշտոնի բարձրացման: Հաջողություն ենք մաղթում:
