ԱՆԴՐՈԳԻՆ
Թիլդա Սուինթոն
Անդրոգին, Անդրոիդ, ավանգարդի թագուհի. ինչպես ասես չեն անվանում արտասովոր արտաքին ունեցող այս դերասանուհուն։ Նրան դժվար է գնահատել «գեղեցիկ- տգեղ» սանդղակով։ Նրա դեմքը, սանրվածքը, հագուստը, կազմվածը մանրակրկիտ մշակված քայլ է՝ դեր, որը խաղում է ամբողջ կյանքի ընթացքում։
- Ես միշտ իմացել եմ, որ չեմ առանձնանում իմ գեղեցկությամբ, -ասում է Թիլդան և հավելում, - սա մեր առավելություն է։ Իմ բոլոր գեղեցիկ ընկերները վաղ թե ուշ գործարկում էին իրենց գեղեցկությունը։ Նրանք մշտապես հիշում են, որ ունեն բաց մազեր, երկնագույն աչքեր, գրավիչ շուրթեր, և նրանք պետք է մշտապես իրենց պահեն համապատասխան իրավիճակին։ Սա մեծ ճնշում է, որից ես ազատված եմ։
Նա չի փորձում դուր գալ բոլորին, չի անում պլաստիկ վիրահատություններ, չի մեծացնում, երկարացնում կամ հաղորդում առավել առաձգական տեսք։ Պարզապես մնում է նույնքան անսովոր, որքան հնարավոր է։ Հայդեր Աքերմանը՝ Սուիթոնի սիրելի դիզայներներից մեկը, ասում է. «Ինձ դուր է գալիս, որ նա չի անհանգստանում մարդկանց դուր գալու կամ չգալու մասին, չի անում դրա համար ոչ մի հատուկ բան»։ Մենք կարող ենք միայն նախանձով նայել նման ինքնավստահ կնոջը։
ԱՆՁՆԱՏՈՒՐ ԼԻՆԵԼ
Քիմ Քարդաշյան
Փոքր տարիքում Քիմը մտահոգվում էր չափից մեծ կրծքերի և ազդրերի համար։ Այնքան, որ փակվում էր լոգարանում և լաց լինում։ «Ես աղոթում էի, որ իմ կուրծքը դադարի աճել,- հիշում է աստղը։ - Հայրս ասում էր, որ ես յուրահատուկ եմ և երբ մեծանամ, դուր կգամ երիտասարդ տղաներին։ Իսկ կարևորը՝ պետք է ինձ ընդունեմ այնպիսին, ինչպիսին կամ։ Եվ դա ինձ իսկապես օգնեց»։ Սակայն, ի տարբերություն այլ հերոսուհիների, իրադրության պասսիվ ընկալումով նա չսահմանափակվեց։ Հասկանալով և ընդունելով ուժեղ կողմերը՝ Քիմը բաց չթողեց պլաստիկ վիրաբուժության միջոցով դրանք ընդգծելու իր հնարավորությունը։ Տարբեր տվյալներով՝ Քիմի արած վիրահատությունների ցանկը ներառում է ռինոպլաստիկա (քթի ձևափոխում), մամոպլաստիկա (կրծքի ձևափոխում), գլյուտեոպլաստիկա (նստատեղի մեծացում), բազմաթիվ լիպոսակցիաներ և պլազմայի ներարկումներ, ինչպես նաև ֆիլլերների միջոցով դեմքի ձևափոխում։ Մենք շնորհակալ ենք Քիմին և ժամանակակից բժշկությանը՝ համառության, սեփական անձի նկատմամբ հավատի, և հատկապես մարզասրահներում ֆիտնես-մարզիչների «այսօր մարզում ենք քարդաշյաններ» արտահայտության համար։
ՏԱՂԱՆԴՆԵՐ ԵՎ ԵՐԿՐՊԱԳՈՒՆԵՐ
Լեդի Գագա
Լեդի Գագան (Ստեֆանի Ջոան Անջելինա Ջերմանոտտա) իրեն երբեք էլ չի համարել յուրահատուկ գեղեցիկ կամ գոնե գրավիչ։ Ամբողջ կյանքում՝ պատանեկության տարիներից ի վեր, «աստղը» պայքարում էր բուլեմիայի՝ անառողջ գիրության դեմ։ Երգչուհու խոսքերով՝ կատարյալ արտաքինը իր համար չունի կարևոր նշանակություն, քանի որ նա մոդել չէ, նրա հիմնական զբաղմունքը երաժշտությունն է, նա ավելի կարևորում է բովանդակությունը, ոչ թե ձևը։ Նրա անհավանական զգեստները, որոնց թվում է նաև մսից պատրաստված զգեստը, ասես ընդգծում է, որ բեմական կերպարը ծառայում է ներաշխարհը արտահայտելուն և օգնում կատարել կերպարի կտրուկ փոփոխություններ։ Երգչուհին ինքնավստահություն է ձեռք բերել իր երկրպագուների օգնությամբ, որոնց շնորհիվ Լեդի Գագան սովորել է ընդունել իրեն այնպիսին, ինչպիսին կա։ Դրա վկայությունն այն խիզախություն է, որով աստղը հայտնվում է հանրության առջև՝ չփորձելով անգամ թաքցնել իր թերությունները, օրինակ՝ նա կարող է քայլել Նյու Յորքի փողոցներով գրեթե մերկ կրծքով՝ չմտահոգվելով, որ նկատելի է մաշկի ձգված բծերը։ «Երբ ես սնվում եմ նորմալ և չեմ անհանգստանում իմ արտաքին տեսքի մասին, ես երջանիկ եմ ավելի, քան երբևէ։ Ես հպարտ եմ ինձնով՝ անկախ իմ կրած հագուստի չափից»,- ասում է Լեդի Գագան։ Մենք աջակցում ենք նրան, սակայն մեկ վերապահումով, երբ նորմալ սնունդը ենթադրում է քաշի հետ խնդիրների բացակայություն։
ՀԱՄԲԵՐՈՒԹՅՈՒՆ ԵՎ ԱՇԽԱՏԱՍԻՐՈՒԹՅՈՒՆ
Լինդսի Վիքսոն
Մոլորակի ամենապահանջված մոդելներից մեկը մանկության տարիներին մտահոգվում էր բարձր հասակի, չափից շատ նիհարության և ամենակարևորը՝ ատամնաշարի առջևի հատավածում ատամների միջև առկա բացի պատճառով։ Մենք այդպես էլ չէինք կարողանա հիանալ նրա անսովոր գեղեցկությամբ, կերպարանափոխվելու ունակությամբ, եթե չլիներ իր ծնողների աջակցությունն ու մեր ժամանակների մեծագույն լուսանկարիչ Սթիվեն Մայզելը, որն այս աղջկա համար բացահայտեց սնդուսափայլ ամսագրերի աշխարհը։ 15 տարեկանում Լինդսին լուսանկարվեց Vogue ամսագրի համար, և դրանից շատ չանցած Միուչչա Պրադան աղջկան ընտրեց Prada ցուցադրության բացման համար՝ որպես Miu Miu ապրանքանիշի դեմք։ Տիկնիկի դեմք, մեծ աչքեր, ծավալուն, գեղեցիկ շուրթեր՝ մոդելին բնորոշ արտաքինը գրավում է ոմանց և վանում շատերին, սակայն Լինդսին արդարացիորեն կարծում է, որ բոլորին դուր գալն անհնար է։ Համառությունն ու աշխատասիրությունը օգնեց նրան ունենալ լայն ճանաչում, ձեռք բերել ինքնավստահություն, իսկ ատամնաշարի թերությունը դարձավ նրա այցեքարտը։ Բնորոշ մանրամասներ․ առօրյա կյանքում մոդելը գրեթե չի օգտագործում կոսմետիկ միջոցներ՝ իր թերությունները համարելով առանձնահատկություն։
