ԼԱՎ Է ՔԻՉ
Մոռացի՛ր խիտ դիմահարդարման մասին: «Լավ է քիչ» կանոնը առավելագույնս հարմար է մաշկի ամառային խնամքի համար: Խնամքի գործընթացը սկսիր բարձր SPF մակարդակով խոնավացնող քսուքից: Որքան բանաձևը հագեցած է, այնքան ավելի փայլուն կլինի դեմքդ, այդ պատճառով նախապատվությունը տուր առավել թեթև միջոցներին:
ԳԼԽԱՎՈՐ ԿԱՆՈՆԸ
Կատարյալ դիմահարդարման համար անհրաժեշտ է կատարյալ հիմք: Դեմքի մաշկին և աչքերի շուրջ հատվածին տարածիր քողարկիչ՝ լայնացած ծակոտիները թաքցնելու, համաչափ երանգ ստանալու և մաշկը դիմահարդարմանը պատրաստելու համար (չէ՞ որ դու չես ուզում, որ այն օրվա ընթացքում ծորա):
BB քսուք
Ամռանը մեր մաշկն ունենում է ավելի մուգ գույն (հուսով ենք դու չես մոռանում արևապաշտպան միջոցների մասին՝ անգամ ամպամած եղանակին), և մեզ անհրաժեշտ է ավելի քիչ քանակությամբ երանգային հիմք՝ թերությունները քողարկելու համար: Այդ պատճառով խորհուրդ ենք տալիս երանգային հիմքը փոխարինել BB քսուքով: Թեթև բանաձևը կապահովի մաշկիդ նուրբ փայլը: Իսկ «ծանր» քսուքները թող մնան ձմեռային ամիսների համար:
ԿԱՅՈՒՆՈՒԹՅՈՒՆ
Պաշտպանություն քրտնարտադրությունից, ծորալուց, խոնավությունից: Այս ամենն առավել անհրաժեշտ են, երբ բարձրանում է օդի ջերմաստիճանը: Օգտագործի՛ր ջրակայուն սևաներկ և աչքերի գծաներկ՝ շրջապատող մարդկանց «պանդայի աչքերով» չվախեցնելու համար:
«Թեթև բաղադրությունը մաշկիդ կպարգևի թեթև, ամառային փայլ»:
ՓԱՅԼԱՏՈՂ ԱՆՁԵՌՈՑԻԿՆԵՐ
Ավելորդ փայլից ազատվելու համար օգտագործում ես դիմափոշի՞: Մտածիր ևս մեկ անգամ: Խոնավ, տոթ օրվա ընթացքում դիմափոշին դեմքի վրա կարող է պնդանալ՝ ինչպես ալյուր: Ավելի լավ է գեղարարային պայուսակում ունենալ փայլատացնող անձեռոցիկներ:
ԸՆԴԳԾԻՐ ՓԱՅԼԸ
Չոր հիմքով միջոցները, օրինակ՝ դիմափոշին, ստվերաներկը և սնգույրը, մաշկի վրա կուտակվում են և օրվա ավարտին ունենում ոչ այնքան հրապուրիչ տեսք: Այդ պատճառով ամռանը նախապատվությունը տուր քսուքային բանաձևերին, որոնք կօգնեն ընդգծել քո գեղեցիկ արևայրուքը: Մենք պաշտում ենք քսուքային ստվերաներկերը՝ հոնքերի տակի մաշկին, այտոսկրերին և ուսերին փայլ հաղորդելու համար:
