ԳԵՂԵՑԿՈՒԹՅՈՒՆԸ ՀԱՍՈՒՆ ՏԱՐԻՔՈՒՄ. ՄԱՇԿԻ ՄԱՐՄՆԻ ԵՎ ԴԵՄՔԻ ԽՆԱՄՔ

Ծերացումն անխուսափելի է, մեզ բոլորիս էլ սպասում են կնճիռներ։ Սա ընկալելով՝ հասկանում ես կարևոր ճշմարտություն․ գեղեցիկ ու խնամված լինելը հնարավոր է ցանկացած տարիքում։ Գլխավորը՝ պետք է իմանալ՝ ինչո՞վ է տարբերվում հասուն մաշկը երիտասարդից։ Մենք կպատմենք։

ՄԱՐՄՆԻ ԽՆԱՄՔ
Տարիների ընթացքում մենք բոլորս էլ բախվում ենք չոր մաշկի խնդրի հետ՝ անկախ դրա նախնական տիպից։ Սա կապված է օրգանիզմում ճարպի քանակի փոփոխության, ինչպես նաև ռեգեներացիոն գործընթացների դանդաղելու հետ, ինչը հանգեցնում է կոլագենի և էլաստինի արտադրության կրճատմանը։ Մաշկի չորությունը հաղթահարելու համար անհրաժեշտ է խթանել արյան շրջանառությունը և օգնել, որ մաշկը նորանա։ Շաբաթը երկու անգամ օգտագործիր սկրաբ, մի մոռացիր ամբողջ մարմինը խոնավացնելու մասին, ինչպես նաև ձեռքերի մաշկը մի մատնիր անուշադրության։ Ամեն օր ձեռքերին տարածիր խոնավացնող քսուք։ Հավելյալ սնուցման համար քսուքը տարածիր քնելուց առաջ։ Դու կզարմանաս՝ որքան հարթ ու խոնավացված կլինի այն առավոտյան։

ԴԵՄՔԻ ԽՆԱՄՔ
Տարիների ընթացքում կոլագենային մանրաթելերը կորցնում են իրենց ճկունությունը և քայքայվում, ինչը հանգեցնում է կնճիռների առաջացմանը, ի հայտ է գալիս չորություն և մաշկի գույնի տարիքային փոփոխություն։ Այդ պատճառով շատ կարևոր է խնամքին բավարար ուշադրություն հատկացնելը։ Անհրաժեշտ է ձեռք բերել այնպիսի միջոցներ, որոնք հարմար են քեզ։ Առաջին հերթին քո մաշկին անհրաժեշտ է սնուցում, ուշադրություն դարձրու այն միջոցներին, որոնք պարունակում են սոյայի գենիստեին և բույսերի ցողունային բջիջներ։ Դրանք ապահովում են անհրաժեշտ խոնավացումն ու կրճատում ծերացման նշանները (օրինակ՝ կնճիռներ)՝ մաշկին վերադարձնելով դրա առաձգականությունը։ Ճիշտ խնամքը ներառում է մաքրում, որը հեռացնում է աղտոտվածությունը, ակտիվացում՝ շիճուկի օգնությամբ, աչքերի շուրջ մաշկի խնամք և հիմնական խնամք՝ ցերեկային և գիշերային  քսուքների կիրառմամբ՝ կախված օրվա ժամանակահատվածից։

ԴԻՄԱՀԱՐԴԱՐՈՒՄ
Իսկ դու գիտե՞ս, որ մաշկի ոչ համաչափ երանգը տեսողաբար ավելի է մեծացնում տարիքը, քան կնճիռները։ Այդ պատճառով չափազանց կարևոր է դիմահարդարման ճիշտ հիմքի ընտրությունը։ Հասուն մաշկի must-have-ը դիմահարդարման և երանգնային հիմքի ճիշտ ընտրությունն են։ Խոնավացնող միջոցից հետո տարածիր դիմահարդարման հիմքը, այն հարթեցնում է մաշկը և օգնում դիմահարդարումը պահպանել առավել երկար ժամանակ։ Հաջորդ քայլը հակատարիքային ազդեցությամբ դիմահարդարման հիմքն է։ Այն տարածելուց հետո կարող ես օգտագործել քողարկիչ՝ գունակային հետքերը, ցանը և աչքերի այտուցվածությունը քողարկելու համար։ Այս քայլերը կատարելուց հետո անցիր դիմահարդարմանը։ Գլխավոր կանոնը՝ խուսափել փայլից։ Փայլով միջոցները սագաթաթիկներն ու կնճիռները դարձնում են առավել նկատելի։ Դրա փոխարեն օգտագործիր ստվերաներկի և լուսարձակող միջոցի փայլատ տարբերակները։ Այն տարածիր հոնքի կամարներին, որից հետո հոնքերին հաղորդիր գույն՝ այն ընդգծելու համար։ Այտերին տարածիր վարդագույն կամ դեղձագույն սնգույրի քիչ քանակություն։ Դիմահարդարումը պատրաստ է։


Տեքստ Ֆոտո Getty Images