Ուրվագծման նպատակը դեմքն ավելի կոկիկ դարձնելն է: Տեխնիկան կառուցված է բաց և մուգ երանգների համադրությամբ: Ուրագծման միջոցով կարելի է խորության էֆեկտ ստանալ, ընդգծել դեմքը և հեռացնել ծավալները: Հայլայթերն օգտագործում ենք այն հատվածների առանձնացման համար, որոնք ցանկանում ենք ընդգծել՝ օրինակ, վիզուալ մեծացնել աչքերը, ունքերը դարձնել ավելի հստակ, տեսողականորեն փոքրացնել քիթը, շրթունքներին ծավալ հաղորդել:
Ինչպե՞ ս ընտրել ուրվագծման միջոց:
Քսուքային կառուցվածքներն ուրվագծման համար բնական տեսք են հաղորդում, հեշտ տարածվում են երանգային քսուքից հետո և միաձուլվում են մաշկին: Դիմափոշային կառուցվածքները թույլ են տալիս ստանալ ցանկացած էֆեկտ՝ բնականից մինչ դրամատիկ և դիմափոշու թեթև երանգ են պահանջում մինչև ուրվագծումը:
Կատարյալ միջոց չկա, պետք է ինքնուրույն ընտրություն կատարես: Գլխավոր չափորոշիչը քո հարմարավետությունն է: Այսօր ես կներկայացնեմ ուրվագծման տեսությունը՝ THE ONE ուրվագծման գունապնակի օրինակով, իսկ քսուքային ապրանքատեսակների մասին դասը կարող ես նայել այստեղ:
Ուրվագծման երանգն անվանում են սեփական ստվերի գույն, այդ իսկ պատճառով ընտրության ժամանակ կողմնորոշվի՛ր մաշկի ենթաերանգով: Ինչ երանգ ունի քո բնական ստվերը՝ այդպիսին էլ պետք է լինի ուրվագծումը: Միջին երանգով գունապնակը հարմար է մաշկի սառը ենթաերանգի համար, իսկ Բացը՝ տաք ենթաերանգի համար: Եթե ենթաերանգը չեզոք է, ապա կարելի է երկուսն էլ փորձել՝ կախված արևայրուք ունես, թե ոչ:
Ինչպե՞ս անել բնական ուրվագծում:
Դեմքի ճիշտ ուրվագծումը սկսվում է մաշկը պատրաստելուց: Երանգն ու քողարկիչը պարտադիր են. չպատրաստված մաշկի դեպքում ուրվագծումը կարող է էսթեթիկ տեսք չունենալ: Քողարկի՛ր բորբոքումը, թարմացրո՛ւ աչքերի շուրջն ընկած հատվածը: Անհրաժեշտության դեպքում երանգն ամրացրո՛ւ դիմափոշով:
Չոր ապրանքատեսակներն ավելի լավ է տարածել լայն, փափուկ վրձնով: Դրանք պետք է լայնությամբ տարածվեն և կիսաթափանցիկ լինեն՝ առանց հստակ սահմանների՝ ստեղծելով բնական ստվերաներկի և թեթև արևայրուքի էֆեկտ:
Տարածման համար ուղղորդվիր՝ հաշվի առնելով դեմքի տիպը:
Քառակուսի դեմք: Ուրվագծումը սկսի՛ր կոպերից՝ անցնելով մազերի աճի հատվածին, ծնոտոսկրին և այտոսկրերին: Հայլայթերով փայլ հաղորդի՛ր ճակատին և կզակին, իսկ սնգույրը տարածի՛ր այտերի խնձորակներին և դեպի վերև՝ աչքերի արտաքին անկյունը: Այսպիսի վարդագունումը կլորացնում է դեմքը և մեղմացնում քառակուսին:
Օվալ դեմք: Ուրվագծելով մգացրու ճակատի եզրագիծը, կզակն ու այտոսկրի ոսկորային մասը: Հայլայթերը տարածի՛ր այտոսկրի վերևի հատվածում, կզակին և քթարմատին: Սնգույրը՝ այտերի խնձորակներին, իսկ մնացածը տարածի՛ր այտոսկրերին:
Կլոր դեմք: Որպեսզի վիզուալ նեղացնես դեմքը, ուրվագծելով մգացրու բոլոր եզրային հատվածները՝ չկպչելով ճակատին և կզակին: Հայլայթերով փայլ հաղորդի՛ր քթի կամուրջին՝ դեմքի կենտրոնական հատվածին ուշադրությունը կենտրոնացնելու համար, առանձնացրո՛ւ այտերի վերևի հատվածն ու կզակի եռանկյունին: Մի փոքր սնգույր տարածի՛ր՝ այտոսկրերից քիչ բարձր:
Ուրի՞շ ինչպես կարելի է օգտագործել գունապնակը:
Ուրվագծման համար նախատեսված մեկ գունապնակը կարող է փոխարինել հարդարման պայուսակի կեսին: Օրինակ, դրա օգնությամբ կարելիէ լիարժեք դիմահարդարում անել:
Վրձնով վերցո՛ւ միջոցը և տարածի՛ր ողջ օրբիտալ գծով. սա կմեծացնի աչքերն ու կընդգծի դրանց խորությունը: Նրբորեն տարածի՛ր աչքերի անկյուններից մինչ կոպերը ընկած հատվածին՝ աչքերի անկյունները վիզուալ բարձրացնելու և հայացքն ավելի կատվային դարձնելու համար: Հայլայթերի օգնությամբ կարելի է փայլ հաղորդել աչքերի ներքին անկյուններին և մինչհոնքային հատվածին, իսկ եթե տարածես այն ողջ անշարժ կոպին, ապա կստացվի փայլող և թարմ հայացք: