Փորձի՛ր քեզ. ինչպե՞ս ես ընտրում ցնցուղի գել

Գրավիչ ձևավորում, հաճելի բույր. վերցնում եմ: Սովորաբար հենց այսպես ենք մենք գնում ցնցուղի գել: Իսկ հարմա՞ր է այդ միջոցը մեր մաշկին: Առաջարկում ենք պարզել օրինակներով:

ՉՈՐ ՄԱՇԿ
 
Քո մաշկն այնքան չոր է, որ հաճախ հղկաթո՞ւղթ է հիշեցնում: Սովորական գելի փոխարեն փորձի՛ր քսուք. այն ավելի նուրբ ազդեցություն է թողնում և օճառ չի պարունակում: Պիտակի վրա փնտրի՛ր խոնավացնող և վերականգնող բաղադրիչներ՝ ձիթապտղի յուղ, հալվե վերա, մեղր, A, B1 կամ E վիտամիններ:

Երեք օրը մեկ չոր խոզանակով, սպունգով կամ հատուկ ձեռնոցով, մերսի՛ր մաշկդ՝ մեռած բջիջները հեռացնելու, արյան միկրոշրջանառությունը ուժեղացնելու և շողացող տեսք հաղորդելու համար: Սակայն չափն անցնել պետք չէ, չափազանց խորը շերտազատումը միայն ավելի կչորացնի մաշկը:

ԽԱՄՐԱԾ ՄԱՇԿ
Եղանակային քմահաճույքները, սխալ սնունդը, վիտամինների պակասը միայն գործոնների մի մասն են, որոնք կարող են մաշկը մոխրագույն և անկենդան դարձնել: Ինտենսիվ վերականգնման բաղադրատոմսը շատ պարզ է: Նախ, խմի՛ր բավականաչափ ջուր: Երկրորդ, մի՛ մոռացիր պարբերաբար շերտազատել մաշկը. այն կօգնի մաշկի մակերեսից մաքրել մեռած բջիջները և առողջ տեսք հաղորդել:

Առավոտդ սկսիր չոր խոզանակով մերսումից, իսկ ցնցուղ ընդունելիս օգտագործիր նուրբ սկրաբային մասնիկներով և թարմացնող մզվածքներով միջոցներ, օրինակ՝  ելակի և լայմի կամ կիվիի: Լայֆհեք. ազդեցությունն ուժեղացնելու համար նրբաքսուքին մի քանի կաթիլ մարմնի յուղ խառնիր: Պատրա՛ստ է. մաշկի առողջ փայլը և էներգիայի լիցքերը երաշխավորված են:

ԶԳԱՅՈՒՆ ՄԱՇԿ
Զգայուն մաշկի խնամքը նման է ականապատ դաշտում զբոսանքի. երբեմն թվում է, որ բացարձակապես բոլոր արտադրանքները բորբոքում, չորություն, ալերգիա կամ էկզեմա են առաջացնում: Առանց խուճապի: Հետևի՛ր մեր պարզ խորհուրդներին՝ գրգռվածությունից խուսափելու համար:

 Սկզբի համար մոռացի՛ր ինտենսիվ բուրավետիչներով գելերի և նրբաքսուքների մասին: Բնական, pH-հաշվեկշռված բանաձևերն ամեն ինչ արժեն: Զգույշ եղիր շերտազատման հետ և ընտրի՛ր հետևյալ առանցքային բառերով միջոցներ. քսուքանման, մեղմ, փափկացնող: Հրաշալի տարբերակ է, օրինակ՝ ցնցուղի ավոկադոյով քսուքը. բաղադրությունում առկա ճարպաթթուները, հակաօքսիդիչները և վիտամինները կխնամեն մաշկը: Եթե հենց գել ես ուզում, բաղադրությունում փնտրի՛ր խնամող յուղեր, օրինակ՝ նուշի: Ցնցուղից հետո մշտապես նրբաքսուք տարածիր՝ մաշկը հանգստացնելու և հարմարավետության զգացողությունը պահպանելու համար

ՅՈՒՂՈՏ ՄԱՇԿ
Նախ, հստակեցնենք. սեբումի արտադրությունը կախված է մի շարք գործոններից (սթրես, հորմոնային մակարդակի բարձրացում, գենետիկա), այն հնարավոր չէ մաքրման միջոցով կանոնավորել: Մեր նպատակն է ընտրել ցնցուղի գել, որը կխոնավացնի՝ միաժամանակ չավելացնելով յուղոտությունը:

Յուղոտ մաշկ ունեցողների ստանդարտ սխալը սպիրտային հիմքով ագրեսիվ միջոցների օգտագործումն է, ինչը միայն խորացնում է խնդիրը: Փորձի՛ր ցնցուղի ավելի նուրբ գելեր, որոնք պարունակում են շերտազատող մասնիկներ: Դրանք մեռած բջիջներից և սեբումից կմաքրեն ծակոտիները՝ այդ կերպ օգնելով խուսափել բորբոքումներից:

Ի՞նչ բաղադրիչներ է սիրում յուղոտ մաշկը: Անանուխը առույգացնում է այն և թարմություն հաղորդում, մորու մզվածքը պարունակում է օգտակար հակաօքսիդիչներ և վիտամին С, նարդոսը բարձրացնում է տրամադրությունն ու հանգստացնում՝ լիցքաթափող բույրի շնորհիվ: Իսկական երջանկություն մաշկի համար:

Տեքստ Ֆոտո Oriflame