1. ՓՆՏՐԻՐ ՈԳԵՇՆՉՈՒՄ ՍՈՑԻԱԼԱԿԱՆ ԿԱՅՔԵՐՈՒՄ
Մազերի բնական գույնին վերադառնալը միշտ էլ փոքր-ինչ անսովոր է ու վախեցնող: Ոգեշնչվի՛ր աստղերի լուսանկարներից, որոնց մազերի բնական գույնը և շողացող փայլը կօգնեն ավելի վստահ վերադառնալ սկզբնական գույնին: Քո փոքրիկ թվային օգնականները կլինեն Ինստագրամը, Յություբն ու Փինթերեսթը:
2. ՎԵՐԱԿԱՆԳՆԻ՛Ր ՄԱԶԵՐԴ
Մազերիդ բնական գույնին վերադառնալու որոշումը կայացնելուն պես սկսիր լրջորեն խնամել մազերդ: Հատկապես, եթե սիրում ես բարդ կտրվածքներ, հաճախ ես չորացնում մազերդ վարսահարդարիչով, օգտագործում ես մազերի արդուկ և այլն: Ահա բաղադրատոմս. վերականգնող շամպուն, սնուցող կոնդիցիոներ և դիմակ: Այս հիանալի եռյակը կօգնի ամրացնել մազերը՝ հաղորդելով առողջ տեսք արմատներից մինչև ծայրեր:
Շաբաթը մեկ անգամ օգտագործիր ճյուղավորման դեմ պայքարող մազերի սնուցող յուղ: Այն կապահովի մազերի հավելյալ սնուցումը՝ դարձնելով դրանք առավել փափուկ:
3. ԿԱՏԱՐԻ՛Ր ՓՈՓՈԽՈՒԹՅՈՒՆՆԵՐ
«Մազերի բնական գույնին վերադառնալը կարող է տևել տարիներ»,- կմտածես դու: Պատասխանում ենք. պարտադիր չէ: Այն ամենն, ինչ քեզ անհրաժեշտ է՝ մազերի աճը չխոչընդոտելն ու ճիշտ երանգային բալզամն ընտրելն է: Երբ վերջինիս երանգը մոտ է քո բնական երանգին, իրական և ոչ իրական գույնի տարբերությունը գրեթե աննկատ է: Իհարկե, մազերը կշարունակեն աճել, իսկ երանգը ակնթարթորեն չի շտկվի: Հենց այդ պատճառով էլ առաջարկում ենք զինվել համբերությամբ, քանի որ դեպի բնական երանգ վերադարձը կարող է տևել 2-ից 4 ամիս:
4. ՀԱՎԱՍԱՐԵՑՐՈՒ ԾԱՅՐԵՐԸ
Ամեն ինչ ստացվեց: Շնորհավորում ենք: Սակայն մի՛ մոռացիր կտրատել ծայրերը ամեն 3-4 շաբաթը մեկ՝ ճյուղավորվող ծայրերից ազատվելու համար: Ամեն անգամ դու կտեսնես, որ մազերիդ գույնը ավելի հարթ է և բնական: Մի՞թե սա չէ երազանքը:
