ԿՎԻՖՖ
Չնայած իր էկզոտիկ անվանմանը, սա, կարելի է ասել, ամենատարածված տղամարդկանց սանրվածքներից է, որը չի կորցնում իր ճանաչումն արդեն տասնյակ տարիներ։ Դրա իմաստը պարզ է՝ ինչպես մկրատի կառուցվածքը. Կողքերից՝ կարճ, վերևում՝ երկար։ Այս սանրվածքը տեսողաբար երկարացնում է դեմքը և ընդգծում անկյունները, այդ պատճառով հարմար է դեմքի կլոր տիպ ունեցողների համար։ Նոսր մազեր ունեցող տղամարդկանց խորհուրդ է տրվում շատ չտարվել վերևի հատվածում ծավալ հաղորդելու գաղափարով։ Նմանատիպ սանրվածքը միջին երկարություն ունեցող մազերի դեպքում կարելի է ստանալ «Ոճի փորձագետ» ուժեղ ֆիքսացիայի մազերի լաքի օգնությամբ։
ՄԵԿ ԿՈՂՄԻ ՎՐԱ
Այս սանրվածքը նախորդի առավել ռադիկալ տարբերակն է։ Մազերը բաժանված են խորը բաժուկով, ինչը դասական կերպարին հաղորդում է հմայք, և առհասարակ, չափազանց հարմար է։ Հնարավոր է սա 2015 թ. ամենահայտնի սանրվածքն էր՝ համաձայն Google-ի վիճակագրության, որը պարտադիր պետք է ունենար իրեն հարգող յուրաքանչյուր նորաձև տղամարդ։ Բացի այդ, այն կատարյալ քողարկում է մազերի նոսրությունը և գեղեցիկ ընդգծում ճերմակած մազերը։
ԳԱՆԳՈՒՐ
Գանգուրները պարզ զարդարանք չէ, սրա հետ կհամաձայնեն բոլոր գանգրահերները։ Եթե դրանք միևնույն ժամանակ նաև խիտ են, ապա ձանձրանալու ժամանակ հաստատ չես ունենա։ Խոշոր ատամիկներով սանրը, մազերի կոնդիցիոները և ջերմապաշտպան ցողաշիթը (վարսահարդարիչ օգտագործելու դեպքում) կդառնան քո մազերի լավագույն ընկերը։
ՏՂԱՄԱՐԴՈՒ ՊՈՉԻԿ
2015 թ. տղամարդու պոչիկը դադարեց լինել արտ-բոհեմի սեփականությունը։ Անթերի է խիտ մազեր և մորուք ունեցող տղամարդկանց դեպքում, գեղեցիկ է ինչպես բնական տեսքով, այնպես էլ երկու կողմերից կարճացված տարբերակով։ Միակ բացասական կողմը. Եթե որոշել ես երկարացնել մազերդ, ապա պետք է մի քանի ամիս դիմանաս՝ մինչ այդ մազերդ դեռ այնքան երկար չեն լինի պոչ կապելու համար, սակայն կլինեն բավարար հավաք սանրվածք ունենալու համար։ Այստեղ քեզ կօգնի գլխարկը։
ՍԱՓՐԱԳԼՈՒԽ
Եթե գանգիդ կառուցվածքը թույլ է տալիս, անգամ մի կասկածիր, այս սանրվածքը ոչ միայն կսազի, այլև կհաղորդի տղամարդկային, ինքնավստահ տեսք։ Մանավանդ այն դեպքում, երբ մազերդ սկսել են նոսրանալ։ Խորհուրդ է տրվում զգուշանալ բոլոր այն տղամարդկանց, որոնք ունեն խոշոր, դեպի առաջ արտահայտված ճակատ։
ԵՐԿԱՐ ՄԱԶԵՐ
Այս սանրվածքը երաշխավորում է տպավորիչ տեսք։ Այն ունի միայն մեկ սահմանափակում. դրա ֆոնին իրենց արտահայտիչ տեսքն են կորցնում բարակ և նրբագեղ դիմագծերը։ Այնպես որ, եթե չես կարող «գլուխ գովել» արտահայտիչ այտոսկրերով, հնարավոր է պետք է ևս մեկ անգամ կշռադատել այս քայլը։ Այս սանրվածքը պահելու հարցում քեզ կօգնեն մազի տարատեսակ գելերը: Պատրաստ եղիր, որ քո մազերիդ երկարելու հետ մեկտեղ կավելանան նաև շամպունի և կոնդիցիոների ծախսերը։
