Ոտքերի խնամք. կա՞ արդյոք կյանք բարձրակրունկներից հետո

Մենք ուղղակի պաշտում ենք բարձրակրունկները, սակայն դրանց հետ ընկերակցելուց մի քանի օր հետո անգամ ամենադիմացկուն կանայք դժգոհում են ցավերից և անհարմարավետության զգացողությունից: Պատմում ենք՝ ինչպես հնարավորինս արագ վերականգնել ոտքերի վիճակը՝ չզոհաբերելով գեղեցկությունը:

1. ԹՐՋՈՒՄ ԵՆՔ
Հոգնածություն զգալու դեպքում հարմար տարայի մեջ լցրու տաք ջուր և ոտքերը մի քանի րոպեով դիր այդ ջրի մեջ: Սկզբում կարող ես զգալ ծակոցներ՝ հատկապես եթե արդեն առաջացել են կոշտուկներ, սակայն տաք ջուրը կօգնի լիցքաթափվել և ազատվել տհաճ զգացողություններից: Կարող ես ավելացնել քիչ քանակությամբ լոգանքի յուղ, որից հետո մի՛ մոռացի՛ր նաև խոնավացնող քսուքի մասին:

2. ԲՈՒԺՈՒՄ ԵՆՔ ՓՈՒՉԻԿՆԵՐԸ
Ցանկացած բաց վերք անհրաժեշտ է անհապաղ բուժել: Նախքան պայթած փուչիկի վրա սպեղանի դնելը, անպայման անհրաժեշտ է ախտահանել մաշկը: Երբեք փուչիկները ինքնուրույն չբացես, քանի որ ներսում պարունակվող հեղուկը քեզ պաշտպանում է վարակներից:



3. ՍՊԱՍՈՒՄ ԵՆՔ
Հնարավոր է՝ սպասումն այս գործընթացի ամենաբարդ հատվածներից է: Իհարկե, դու պետք է հենց այս պահին կատարես այցելություն քո սիրելի կոշիկներով, սակայն այսպես դու միայն կբարդացնես վիճակը: Ուզո՞ւմ ես արագացնել բուժման պրոցեսը: Օգտագործի՛ր ոտքերի դիմակ կամ խոնավացնող գուլպաներ


4. ՈՏՔԵՐԻ ՊԵԴԻԿՅՈՒՐ

Այն հատվածներում, որտեղ քո գեղեցիկ կոշիկները սեղմում են ավելի շատ, մաշկը ավելի է տուժում և կարող է ճաքել: Օգտագործիր պեմզա՝ մահացած բջիջները զգուշորեն հեռացնելու համար, իսկ այնուհետև անպայման տարածիր ոտքերի հատուկ քսուք: Հատուկ ուշադրություն դարձրու մատների աճի հատվածի և կրունկների մաշկին: Հենց այս հատվածներին է բաժին ընկնում հիմնական ծանրաբեռնվածությունը՝ կրունկների վրա քայլելիս: Ուշադրությամբ զննիր եղունգները, քանի որ աճած կամ վատ կտրած եղունգները կարող են դառնալ տհաճ զգացողությունների պատճառ: 


5. ՔԱՅԼԵՆՔ ԲՈԿՈՏՆ
Հոգնած, այտուցված կամ հարած ոտքերի հանգիստ պարգևելու լավագույն միջոցը որոշ ժամանակ ոտաբոբիկ քայլելն է, այնուհետև տարածել կիվիի և անանուխի մզվածքով խոնավացնող քսուք. պատրա՞ստ ես զբոսանքի: Հագի՛ր քո ամենահարմար՝ առանց կրունկների կոշիկները և քայլիր, քո ոտքերն անպայման շնորհակալ կլինեն: Կարևոր է, որ կոշիկն ապահովի մաշկի վնասված հատվածների հետ նվազագույն կոնտակտ: 


6. ՈՏՆԱԹԱԹԻ ՄԵՐՍՈՒՄ

Ոտնաթաթի կամարում գտնվում են մկաններ, որոնք կայունացնում են մարմնի դիրքը և քայլելիս պահպանում դրա քաշը: Այս մկանների խորը մերսումը կօգնի ակտիվացնել արյան շրջանառությունը և ազատվել ցավերից:

7. ԾՐԱԳՐԱՎՈՐԵՆՔ ՆԱԽՕՐՈՔ
Ընտրի՛ր կոշիկներ, որոնք առավելագույնս հարմար են ոտքերիդ: Պարզ է, որ բարձրակրունկների դեպքում կատարյալ արդյունքի հասնելը բարդ է, սակայն արժե գոնե փորձել:  Նեղ կոշիկներ կրելու դեպքում ցավերի զգացողության առաջացումը պարզապես ժամանակի հարց է: Հարմարավետության համար կարող ես կրել միջատակ-սուպինատորներ, իսկ առավել խոշոր կրունկները կավելացնեն կայունություն և քայլելիս կօգնեն առավել համաչափ բաշխել մարմնի քաշը:

Մեր բոլոր խորհուրդները հաշվի առնելու դեպքում վնասվածքները պետք է անցնեն ավելի արագ, իսկ ոտքերդ կրկին պատրաստ կլինեն կրել քո շատ սիրելի, գեղեցիկ կոշիկները:








Տեքստ Ֆոտո Shutterstock