ՄԱԶԵՐԻ ՑՈՂԱՇԻԹ
Մարդկանց մեծամասնությունը ցողաշիթը տարածում է չափազանց մոտ տարածությունից՝ կենտրոնանալով մազերի փոքր հատվածի վրա: Արդյունքում ստացվում է միմյանց կպած մազեր, որոնք ունեն, մեղմ ասած, ոչ այնքան գեղեցիկ տեսք: Սրվակից մինչև մազերն ընկած տարածությունը պետք է կազմի 30 սմ: Այսպես միջոցը կցողվի ամպիկի տեսքով և համաչափ կտարածվի ողջ մակերեսով:
ՄՈՒՍ
Մազերը հարդարելու մուսը լավագույն տարբերակն է անկենդան մազերի համար, սակայն ոչ ճիշտ օգտագործումը կարող է ապահովել խճճված մազեր և ոչ հրապուրիչ արդյունք: Գանգուր մազերի դեպքում ափերի մեջ վերցրու մուսի փոքր քանակություն և տարածիր խոնավ մազերին՝ սկսելով մազերի մեջտեղի հատվածից մինչև ծայրեր: Իսկ սանրը կօգնի այն տարածել արմատներից մինչև ծայրեր, ինչը սանրվածքին կհաղորդի գեղեցիկ տեսք:
ՇԻՃՈՒԿ
Եթե մազերդ ունեն ոչ բավարար փայլ, ապա շիճուկը հենց այն միջոցն է, որը կոչված է լուծելու այդ խնդիրը: Շիճուկի մի քանի կաթիլը կստեղծի բարակ, պաշտպանիչ շերտ, որը մազերին կհաղորդի փայլ: Չպետք է չարաշահել, չպետք է միջոցը տարածել մազարմատներին: Դրա փոխարեն միջոցը տարածիր մազերի ծայրերին, այնտեղ, ուր մազերն առավել հաճախ են վնասվում:
ՋԵՐՄԱՊԱՇՏՊԱՆՈՒԹՅՈՒՆ
Սովորաբար աղջիկները ցողում են մազերի ջերմապաշտպանիչ միջոց և միանգամից սկսում հարդարել մազերը: Եթե չես ուզում մազերը վնասել, ջերմապաշտպանիչն անհրաժեշտ է կիրառել մազերի ողջ երկարությամբ՝ փունջ առ փունջ, այն հավասարաչափ տարածելով սանրի օգնությամբ: Հատուկ ուշադրություն դարձրու դեմքի շուրջ մազերին:
ՉՈՐ ՇԱՄՊՈՒՆ
Չոր շամպունը հեռացնում է գլխամաշկի բնական ճարպը և մազերին հաղորդում գեղեցիկ տեսք: Սա շատ օգտակար և արդյունավետ միջոց է: Միևնույն ժամանակ, կանանց մեծամասնությունը միջոցը կիրառում է սխալ՝ տարածելով այն կեղտոտ մազերին: Դրա փոխարեն չոր շամպունն անհրաժեշտ է մերսող շարժումներով տարածել գլխամաշկին՝ մազարմատների մոտ այնպես, ինչպես դա կանեիր շամպունը կիրառելիս: Այնուհետև անհրաժեշտ է սանրել մազերը՝ սպիտակ թեփուկներից ազատվելու համար:
ՉԼՎԱՑՎՈՂ ԿՈՆԴԻՑԻՈՆԵՐ
Շատերը համոզված են, որ չլվացվող կոնդիցիոները չի պահանջում սովորական կոնդիցիոների օգտագործում: Սա տարածված սխալ է: Մազերն անհրաժեշտ է լվանալ սովորականի պես: Օգտագործիր քո սիրելի կոնդիցիոները, լվա այն, այնուհետև մազերը բաժանիր մազափնջերի և դրանցից յուրաքանչյուրին տարածիր չլվացվող կոնդիցիոներ:
