Դու վերջերս ես նկարահանվել Օրիֆլեյմի «Գեղեցկությունը՝ որպես կենսակերպ» գովազդում, և ես կուզենայի քեզ տալ այն հարցը, որը Եկատերինա Գուսևան ուղղում է մեր հեռուստադիտողին: Ի՞նչ է քեզ համար գեղեցկությունը:
Գեղեցկությունը՝ ներդաշնակություն է: Ինձ համար կարևոր ցուցանիշը իմ կողմից կատարված ճիշտ գործողություններն են, ինչից հետո ես պարզապես լիցքաթափվում եմ: Այսինքն՝ եթե անցնում ես ֆիլերների որևէ կուրս, քո տանը հնարավոր է գտնել քսուքների 150 սրվակ, և ուտում ես միայն օգտակար սմուզիներ՝ ներքուստ մնալով լարված, ապա ինչ-որ բան սխալ ես անում: Իսկ եթե քո գործողությունները քեզ պատճառում են հաճույք, և դրան գումարած՝ կարողանում ես պահպանել քո գեղեցիկ արտաքին տեսքը, դա հիասքանչ է:
Բայց չէ՞ որ կարելի է ոչինչ չանել և լինել միանգամայն լիցքաթափված:
Այո, և շատ կարևոր է դրան մոտենալ գիտակցաբար: Երբ սկսում ես մտահոգվել քո ներքին զգացողության մասին, արդյոք ճիշտ ես նստած, ուզում ես խմել, թե՞ խնձոր ուտել, քանի որ աշխատում ես արդեն 5 ժամ շարունակ և վերջին անգամ սնունդ ընդունելուց անցել է 5 ժամ, այդ ժամանակ քո ինքնազգացողությունն ու աշխարհընկալումը քեզ համար դառնում է շատ կարևոր, ու հենց այդ ժամանակ էլ առաջանում է ներդաշնակության ու լիցքաթափության զգացողությունը:
Բյութի-բլոգեր դառնալու համար երկար տարիներ աշխատել ես որպես գեղեցկության խմբագիր: Ինչպե՞ս էր տարիների ընթացքում փոխվում գեղեցիկի քո ընկալումը:
Ինձ համար ամեն ինչ սկսվեց մշտապես անթերի տեսք ունենալու իմ ներքին նևրոզից...
Ըստ չափանիշների..
Այո, ըստ չափանիշների, և անպայման դիմահարդարում: Բնական է, որ մշտապես անթերի տեսք ունենալն անհնար է, և դու սկսում ես մտահոգվել: Սակայն գեղեցկության ողջ ինդուստրիան կառուցված է քեզ ավելի ու ավելի վախեցնելու վրա՝ իսկ այստեղ քեզ մոտ նկատվում են կնճիռներ, ծակոտիներդ տեսանելի են և այլն:
Եվ ինչպես դա հաղթահարեցիր, ի՞նչ կատարվեց:
Երևի թե տարիները: Ես փորձեցի բոլոր այն միջոցները, որոնք երբևէ ուզել եմ, եվ իմ հսկայական փորձը ցույց է տալիս, որ գոյություն չունեն, այսպես կոչված, «հրաշք քսուքներ»: Կան քիչ թվով օգտակար գործողություններ: Խնամք, որը պետք է անպայման լինի հնարավորինս պարզ, բայց ամենօրյա: Դա իրոք աշխատում է, և պետք չէ սրա մասին մոռանալ: Իհարկե, չպետք է մտածել, որ ամեն ինչ կընթանա՝ ինչպես մեզ գովազդում են դա ցույց տալիս:
Դու օգտագործո՞ւմ ես որևէ մեկ շարքի միջոցներ
Գրեթե: Դիմակները կարող են փոխվել, երբեմն փոխում եմ շիճուկները, սակայն քսուքները և մաքրող միջոցները միշտ նույն շարքից են: Ես ունեմ միջոցների հավաքածու, որոնք հարմար են հենց ինձ, մշտապես օգտագործում եմ դրանք, երբեմն փորձում նաև նորույթներ:
Ինչպե՞ս գտնել այն միջոցները, որոնք հարմար են մեր մաշկին:
Սա ամենաբարդ հարցն է: Բժիշկ-մաշկաբանիս հետ ունեցել եմ հիանալի փորձ, որը բացատրեց՝ ինձ պետք չեն քսուքներ, այլ միայն թեթև էմուլսիաներ, քանի որ քսուքներում միշտ առկա են յուղեր, որոնք ծակոտիների վրա բացասաբար են ազդում: Այսինքն՝ նկատի ունեմ բաղադրությունը, ոչ թե կոնկրետ ապրանքանիշ: Սա առաջին մոտեցումն է: Երկրորդ մոտեցումը՝ ընտրել մաշկի նույնատիպ խնդիրներով բլոգեր և հետևել, թե ինչպես է նա այդ խնդիրներին տալիս լուծում:
Պատմիր՝ ինչն է քեզ համար ամենից անսովորը կամ անսպասելին մաշկի խնամքում: Գուցե կարո՞ղ ես այս պահին պարզաբանել որևէ հայտնի առասպել:
Վերցնենք խոնավացումը: Կան բաղադրիչներ, որոնք դեմքի վրա, ասես, ստեղծում են պաշտպանիչ շերտ, և այդ կերպ քո մաշկը չի կորցնում խոնավությունը, այսինքն՝ դրանք նվազեցնում են ջրի տրանսէպիդերմալ կորուստը: Իսկ կան բաղադրիչներ, որոնք ձգում են խոնավությունը, ինչպիսին է հիալուրոնաթթուն: Առաջանում է հարց. որտեղի՞ց վերցնել այդ խոնավությունը, օրինակ՝ եթե դու գտնվում ես Մոսկվայում, ձմեռ է, աշխատում է ջեռուցումը և օդը շատ չոր է: Ոչ մի տեղից: Եվ հուսալ, որ խոնավացնող քսուքը քեզ կօգնի օդի մեջ խոնավության ի սպառ բացակայության դեպքում այնքան էլ տրամաբանական չէ: Այդ պատճառով էլ ինձ մոտ դրված է օդը խոնավացնող երկու սարք:
Ինչպե՞ս ես քեզ մոտիվացնում ամենօրյա խնամք կատարելուն:
Սա սովորություն է, ինչպես ատամների մաքրումը: Առհասարակ, ինձ համար շատ տարօրինակ է կնոջից լսել, որ նա անտեսում է խնամքը, քանի որ բացի օգտակար լինելը, նաև հաճելի է: Իսկ խնդրահարույց մաշկ ունենալու դեպքում՝ բավական է բաց թողնել մեկ օր, և ողջո՛ւյն, ջրազրկում, կարմիր հետքեր, շերտազատում և այլն: Դիմահարդարումը նման մաշկի վրա չի կարող կատարյալ «նստել», և արտաքին տեսքը ոչ այնքան հաճելի է: Ինձ մոտ խնդիրներ են լինում երեկոյան պրոցեդուրաների հետ, քանի որ ես դրանք հետաձգում եմ մինչև քնի ժամ և ոչ մի կերպ չեմ կարողանում ինձ սովորեցնել այդ գործընթացը սկսել տուն հասնելուն պես: Այս սովորությունը ուզում եմ ձեռքբերել արդեն նոր տարում:
