ԳՐԻՐ, ՄԻ՛ ԿՐՃԱՏԻՐ
Անգամ բարդ իրավիճակում ինքդ քեզ հասկանալու, կասկածները ցրելու, գրառում կամ բիզնես ծրագիր կազմելու և զգացմունքները դուրս մղելու գործում կօգնի ֆրիրայթինգը՝ մտքին եկող ամեն բան գրի առնելու սովորույթը: Թայմերը դիր 15-20 րոպեի վրա և կենտրոնացրու մտքերդ: Գլխավորը կանգ չառնելն է, ուղղագրության մասին չմտածելը և չխմբագրելը: Կենտրոնացիր գրչի՝ թղթի վրայով անցնելու պրոցեսի վրա և շուտով կնկատես, ինչպես են ծնվում հետաքրքիր գաղափարներ, մտորումներ, խորը զգացմունքներ, որոնց գոյության մասին դու նույնիսկ գլխի չէիր ընկնում: Դարձրու ֆրիրայթինգն առավոտյան սովորույթ, գրիր արթնանալուց անմիջապես հետո, երբ ուղեղդ վերաբեռնվել է և պատրաստ է ստեղծագործելուն:
ԹԱՆԿ ՕՐԱԳԻՐ
Օրագիրն անհրաժեշտ է ոչ միայն նրա համար, որպեսզի վավերագրես կյանքի իրադարձությունները և թղթին հանձնես տանջալից ապրումները: Այն կարող է ինքնագնահատականը բարձրացնելու գործիք դառնալ (ամեն երեկո նվաճումների ցանկ կազմելու դեպքում), սեփական արդյունավետությունը գնահատելու գործիք (եթե գրի առնես այն, ինչ չի հաջողվել անել և ինչու չի հաջողվել) և տրամադրությունը բարձրացնելու միջոց (թվարկիր, թե ում և ինչի համար կուզեիր շնորհակալություն հայտնել): Օրագիրը նաև հիանալի օգնական է ստեղծագործական միտքը և բիզնեսը զարգացնելու գործում: Ընտրի՛ր գործիդ հետ կապված 16 թեմա, և ամեն օր գրիր դրանցից մեկի մասին: Երբ հասնես ցանկի վերջին, սկսիր սկզբից: Այդպիսով դու կհետևես գործընթացներին և աշխատանքի կարևոր ուղղություններին, կտեսնես առաջընթացն ու դուրս կբերես խնդիրները: .
ՑԱՆԿԵՐԻ ՈՒԺԸ
Ցանկությունների թերթիկի արդյունավետության մասին երևի արդեն լսել ես: Իրականում այդ ցանկը կարելի է բաժանել ամենատարբեր թեմաների և դրանց օգնությամբ դու կկարողանաս ավելի լավ ճանաչել ինքդ քեզ, մանրամասն մշակել նախագծերը, հստակեցնել քո արժեքներն ու համոզմունքները, վախերն ու կասկածները: Տարբերակները կարող են այսպիսին լինել՝ «Գումար վաստակելու 100 եղանակ» «Անգլերեն սովորելու 100 պատճառ», «100 վայր, որտեղ կուզեի լինել»: Մեթոդի հեղինակ Քեթլին Ադամսը համարում է, որ առաջին 30 դրույթները որպես կանոն այն գաղափարներն են, որոնք վաղուց պտտվում են քո գլխում: Հաջորդ 40 կետերում դու կհանդիպես կրկնությունների և ամենատարբեր կլիշեների, իսկ վերջին 30 կետերն ամենաանսովորն են, կրեատիվը, և, հնարավոր է, քո իրավիճակի համար անեմահարմար տարբերակները:
