Մի քանի տարի առաջ մենք որոշեցինք զբաղվել վեգանյան արտադրանքի արտադրությամբ: Ինչպե՞ս առաջացավ այս գաղափարը և ինչո՞վ է վեգան լինելը տարբերվում առավել հայտնի և տարածված բուսակերությունից:
Վեգանությունը առավել երիտասարդ ուղղություն է, որը սկիզբ է առել բուսակերությունից: Բուսակերները հրաժարվում են մսի, ձկան և թռչնի բոլոր տիպերի կիրառումից: Վեգանները շարժվել են էլ ավելի առաջ, նրանց նպատակը բնությունն ու կենդանիներին խնայելն է՝ ամբողջությամբ հրաժարվելով կենդանական ծագում ունեցող բաղադրիչներից, այստեղ արդեն ներառված են կաթնամթերքը, հավկիթն ու անգամ մեղրը: Չորս տարի առաջ ռուսաստանյան շուկայում չկար վեգանյան կաթ և պանիր, այսինքն մթերք՝ առանց կենդանական բաղադրիչների, որոնք համով հիշեցնում են սովորական կաթնամթերքը: Հենց այդ ժամանակ էլ զգացինք նման խանութ ունենալու անհրաժեշտությունը: Սկսեցինք սոյայի և ընկույզի կաթի արտադրությունից: Մշակեցինք պահքի պանրի բաղադրատոմս (այն չի ներառում կաթ): Այսօր հպարտությամբ կարող ենք ասել, որ VolkoMolko-ն առաջին ընկերությունն է, որը մշակել և թողարկել է վեգանյան պանիրը Ռուսաստանում:
Չորս տարվա ընթացքում մենք ոչ միայն վերամշակեցինք առաջին վեգանյան պանրի բաղադրատոմսը, այլև ընդլայնեցինք շարքը. այժմ վեգանյան պանրի տեսականին ներառում է մինչև 6 տեսակ: Մեր ողջ տեսականին ներառում է 6 տեսակ պանիր, 4 տեսակ բուսական կաթ, թխվածքաբլիթ և սոյայի խտացված կաթ: Ամբողջ տեսականին բացառապես պահքի է, այսինքն դրանց մեջ ներառված չեն կաթ, հավկիթ և անգամ մեղր: Մեկ տարի անց մենք շեշտը դրեցինք խանութներում և սրճարաններում աշխատանքի վրա: Սրանք նեղ մասնագիտացված խանութներ են, որոնք տեղակայված են ամբողջ Ռուսաստանում՝ Կալինինգրադից մինչև Պետրոպավլովսկ-Կամչատսկ: Վաճառքների շատ քիչ բաժին են կազմում նաև Մոսկվայի ինտերնետ-վաճառքները:
Ի՞նչ բարդությունների հանդիպեցիք մեկնարկին:
Տարածքի որոնում, գործընթացների մեկնարկ, գումարի, մարդկանց և փորձի պակաս: Շատ բան սկզբնական փուլում ստիպված էինք անել ինքներս: Կարծում եմ, որ դա անգամ բիզնեսի հաջողությունն է, քանի որ քո գործի նկատմամբ սիրո շնորհիվ՝ ուզում ես անել առավելագույնը: Երբ բացակայում է բիզնես ստեղծելու փորձը, գործընթացներից յուրաքանչյուրը նման է դժվարություններ հաղթահարելուն և ուսուցման՝ անգամ արագ ու որակով անելու ցանկության դեպքում: Մենք բավականին հաջողակ ենք, քանի որ ճանապարհին մեզ հանդիպեցին հիանալի մարդիկ, ովքեր օգնեցին թե՛ խոսքով, թե գործով: Հենց այդ օգնության շնորհիվ էլ մենք հաղթահարեցինք նոր խնդիրներն ու բարդությունները:
Ինտերնետ -խանութ ստեղծելու համար լավ է օգտագործել անվճար կայք- ձևանշումներ, թե՞ ստեղծել սեփականը: Ինչի՞ն է անհրաժեշտ հատկացնել ավելի շատ ուշադրություն և ինչպե՞ս ընտրել հոսթինգը:
Ինտերնետ-խանութ ստեղծելիս՝ մենք փորձ չունեինք: Մենք սկսել ենք, ըստ մեզ, ամենապարզ ու հասանելի տարբերակից՝ հարթակից, որտեղ հնարավոր է ինքնուրույն ստեղծել կայք՝ ըստ ձևանմուշի: Դա բավականին հարմար և արագ տարբերակ է: Հոսթինգն ընտրեցինք Ռուսաստանի ամենախոշոր ընկերությունից, ինչը նաև եղավ պարզ ու հասանելի տարբերակ:
Պատմեք սոցիալական կայքերի մասին: Դուք ինքներդ եք էջերը վարում, թե՞ հրավիրել եք smm-մենեջերի: Ձեր կարծիքով ո՞ր սոցիալական կայքերն են առավել շահավետ բիզնես վարելու տեսանկյունից:
Հենց սկզբից ամենաուժեղ հարթակը «Vkontakte» սոց. կայքն էր: Հենց այնտեղ էր հնարավոր ստեղծել խումբ, որտեղ կլիներ արտադրանքի նկարագիրն ու այն գնելու հնարավորությունը: Ինչը և մենք արեցինք սեփական ուժերով: Smm մենեջերին ներգրավելու հնարավորությունն ունեցանք միայն մեկ տարի անց: Եվ հենց թիմում փորձառու մասնագետի համալրման հետևանքով էլ կարողացանք լայնացնել առաջխաղացման հնարավորությունները՝ ներառելով նաև Ֆեյսբուքն ու Ինստագրամը:
Գնորդները շատ տարբեր են, բոլորը շատ ակտիվ են տարբեր սոցիալական կայքերում, այդ պատճառով էլ կարելի է ասել, որ յուրաքանչյուր ցանց տալիս է ակտիվություն գնորդների առանձին խմբերում: Օրինակ՝ ալերգիա ունեցող և տարածաշրջաններում ապրող վեգանները մեզ հետ շփվում են «Vkontakte» սոց. կայքում մեր խմբի միջոցով: Մոսկվայի և առողջ կենսակերպի օգտին ընտրությունը կատարող գնորդները մեզ հետ շփվում են Ֆեյսբուք և ինստագրամ սոց. կայքերի օգնությամբ: Մենք նաև ունենք YouTube ալիք, որտեղ տեղադրում ենք մեր արտադրանքի օգնությամբ համեղ ճաշատեսակների պատրաստման բաղադրատոմսերը, ինչպես նաև ընկերության մասին հարցազրույցները:
Ձեր ինստագրամում կան շատ գեղեցիկ նկարներ: Ինքնե՞րդ եք դրանք ստանում, թե՞ խնդիրը դրված է լուսանկարչի առջև:
Բոլոր լուսանկարներն արվում են պրոֆեսիոնալ լուսանկարչի կողմից: Մենք շատ ենք սիրում մեր արտադրանքը և կարծում ենք, որ լուսանկարները պետք է արվեն բացառապես լուսանկարչական ինդուստրիայում հարուստ փորձ ունեցող լուսանկարիչների կողմից: Հենց դրա համար էլ դրանք այդքան գեղեցիկ են ու «համեղ»: Բացի այդ, մենք հաճույքով կիսվում ենք մեր հաճախորդների լուսանկարներով, արձագանքներով և նրանց կազմած բաղադրատոմսերով:
Ի՞նչն է ամենից շատ ոգեշնչում ձեռներեցության մեջ:
Կարծում եմ՝ դա կարելի է համեմատել երեխայի ծնունդի և նրա դաստիարակության հետ: Ամեն օր դու ոչ թե ընկերության կողքին ես, այլ հենց դրա ներսում՝ քո փոքրիկի ներսում: «VolkoMolko» ընկերությունը ստեղծելուց գրեթե մեկ տարի անց ես հասկացա շատ կարևոր բան. ընկերությունը զարգանում է միայն այն դեպքում, երբ զարգանում ես հենց ինքդ: Էներգիայի վերադարձի ուժն այդքան հզոր է: Որքան շատ ես ներդնում, այնքան ուժեղ է այն անդրադառնում, և այդքան էլ վերադարձնում է քեզ: Երկու պրոցեսներն էլ (տալու և ստանալու) շատ լիցքավորում են: Ընկերությունն ունի կարգախոս՝ «Սերն առ բնություն, սերն առ քեզ»: Մենք դա զգում ենք, մենք դրանով կիսվում ենք, դա մեզ ոգեշնչում է:
