ԷՆՏՈՒԶԻԱԶՄ ԴՐՍԵՎՈՐԻՐ
Հարազատներդ սիրում են քեզ, այդ պատճառով փորձում են քեզ պաշտպանել հնարավոր հիասթափություններից և անհաջողություններից: Դու պետք է հանգստացնես նրանց: Համոզի՛ր նրանց, որ սիրում ես այն, ինչով զբաղվում ես: Բացատրի՛ր աշխատանքիդ բոլոր նրբությունները և անպայման պատմի՛ր քո առաջին նվաճումների մասին: Այդպես դու ոչ միայն կստիպես, որ նրանք փոխեն իրենց կարծիքը, այլ նաև, հնարավոր է, ոգեշնչես նրանց ևս զբաղվելու որևէ հետաքրքիր բանով:
ՊԱՐԶԻՐ ՊԱՏՃԱՌԸ
Ավելորդ չի լինի պարզել, թե ինչու են հարազատներդ դեմ քո նախաձեռնություններին: Խնդրիր, որ նրանք հայտնեն իրենց կարծիքը, պատմեն իրենց կասկածների ու վախերի մասին, դա քեզ թույլ կտա իրավիճակին նայել այլ դիտանկյունից, վերհանել ցավոտ կետերը և խուսափել հնարավոր սխալներից:
ՍԱՀՄԱՆՆԵՐ ԳԾԻՐ
Հաշտվի՛ր այն մտքի հետ, որ հարազատները կարող են չկիսել քո դիրքորոշումը, և դա նրանց իրավունքն է: Սակայն լսել նրանցից չխնդրած խորհուրդները բոլորովին էլ պարտադիր չէ: Հստակեցրու, թե ինչն ես ուզում քննարկել հարազատներիդ հետ, իսկ ինչը՝ ոչ: Հնարավոր է, իմաստ ունի աշխատանքի մասին ընդհանրապես չխոսելը: Չէ՞ որ դուք առանց այդ էլ բազմաթիվ հետաքրքիր թեմաներ և ընդհանուր հետաքրքրություններ ունեք:
ԱՄՐԱՊՆԴԻՐ ԻՆՔՆԱԳՆԱՀԱՏԱԿԱՆԴ
Եթե ընտանիքի անդամները քո նախաձեռնություններին չեն աջակցում, դա չի նշանակում, որ քեզ հետ ինչ-որ բան այն չէ: Հարազատների խոսքերը սրտին շատ մոտ մի՛ ընդունիր, և փորձիր տարանջատել զգացմունքները փաստերից: Ասում են, որ քեզ մոտ ոչինչ չի՞ ստացվի:Հիշի՛ր անցած ամեն բան, անգամ ամենափոքր հաղթանակներդ: Իրավիճակներ, որոնք կարողացել ես հաղթահարել, և զբաղմունքներ, որոնցում կարողացել ես հաջողության հասնել: Քո թիկունքում քո փորձն է, որի վրա կարող ես հենվել, երբ գնում ես նոր փոփոխությունների:
ՓՈԽԻՐ ՇՐՋԱՊԱՏԴ
Հավանության ու աջակցության կարիք ունի մարդկանց մեծամասնությունը: Իհարկե, դեպի նպատակ շարժվելն ավելի հեշտ է, երբ կա մեկը, ով հավատում է քեզ, պատրաստ է լսել քեզ ու խրախուսել: Սակայն պարտադիր չէ, որ դրանք լինեն քո հարազատները: Գտի՛ր համախոհներ կամ մարդկանց համայնք ստեղծիր, որոնք իրենց նախագծերն են զարգացնում և ևս աջակցության կարիք ունեն: Հանդիպումներ կազմակերպիր, որոնց ժամանակ մեկ բաժակ թեյի շուրջ դուք միմյանց կպատմեք ձեր ծրագրերի և արդյունքների մասին, փորձի և խորհուրդների փոխանակում կանեք:
