ԴԱՐՅԱ ՄԻԼԿԱ
19 տարեկան, մոդել
«Իմ մասնագիտության վերաբերյալ որոշ կարծրատիպեր կան՝ կապված տարիքի հետ: Օրինակ՝ մոդելի կարիերան պետք է սկսել 13 տարեկանից, և եթե 25 տարեկանում դու դեռ թոփ-մոդել չես, ապա, ցավոք, արդեն մոտենում ես մայրամուտին:
Մարդիկ շատ հաճախ ինձ հենց այս պատկերացումների պրիզմայով են ընդունում: Օրինակ՝ համարվում է, որ ես ուշ եմ սկսել 16,5 տարեկանում: Շատերը նաև թյուրիմացության մեջ են ընկնում տարիքիս պատճառով, քանի որ լուսանկարներում ես տարբեր տեսք եմ ունենում:
Մեկ այլ կարծրատիպ է այն, որ 20 տարեկանում պետք է կրթություն ստանալ, սովորել համալսարանում, ապագա կառուցել: Հաճախ այս ճնշումը ծնողների կողմից է: Սակայն ինձ թվում է, որ համալսարան կարելի է գնալ նաև 30 տարեկանում, և նույնիսկ զուգահեռ աշխատել: Իսկ եթե հիմա ցանկանում եմ ճամփորդել, և մասնագիտությունս ինձ տալիս է նման հնարավորություն, ես կցանկանայի իրականացնել այդ ցանկությունս, իսկ թե հետո ինչ կլինի, կտեսնենք: Հուսով եմ՝ ամեն ինչ միայն ավելի լավ կլինի»:
ԻՐԻՆԱ ԳՈՐԲԱՉՈՎԱ
30 տարեկան, դերասանուհի, բլոգեր
«Տարիքային կարծրատիպեր, բնականաբար, գոյություն ունեն: Թատրոնում ամեն ինչ պարզ է. տարբեր հերոսուհիների մարմնավորելու համար մի շարք միջոցներ գոյություն ունեն: Եթե հասկանում ես՝ նա քանի տարեկան է, պարզապես անհրաժեշտ կլինի համապատասխան դիմահարդարում կատարել: Եվ պլաստիկան. որքան ավելի երիտասարդ ես, այնքան ավելի արտահայտիչ, անհեթեթ, անշնորհք ես, իսկ երբ տարիքով ես, դառնում ես նվազ շարժուն: Սրանք դրոշմակնիքներ են, որոնք, այնուամենայնիվ, օգնում են ցույց տալ հերոսի տարիքը:
Կյանքում ես հաճախ բախվում եմ նման իրավիճակների. «Դե, Իրա, դու արդեն 17…, 21, 22, 23, 24... տարեկան չես», այսինքն՝ կաղապարներ կան ցանկացած տարիքի համար: Հետո՛ ինչ: Անձամբ ես ինձ 17-18 տարեկան եմ զգում: Իրականում ես չգիտեմ՝ ինչպես պատասխանել նման հարցերի, քանի որ չեմ հասկանում՝ ի՞նչ է «տարիքը»: Ես կարծում եմ, որ տարիք չկա. այ, այսպիսի մարդ եմ ես: Այո, անձնագրում կա, իսկ փաստացի՝ ոչ:
Ես չեմ փորձում ինչ-որ բան իրականացնել ինչ-որ բանի սահմաններում, ես պարզապես ապրում եմ: Թեև վերջերս նոր երազանք է ծնվել, որով ես իրոք ոգևորվել եմ. մեկ տարում շուրջերկրյա ճամփորդություն կատարել, հնարավորության դեպքում՝ մեքենայով: Ես զգացի, որ ուղղակի հեռանալ այս աշխարհից, երբ գա ժամանակը, և ոչ մի անգամ չտեսնել այս սքանչելի երկրագունդն ամբողջությամբ, իմ կարծիքով, տարօրինակ կլինի: Այդ պատճառով կփորձեմ իրականություն դարձնել այդ երազանքը»:
ՎԻԿՏՈՐՅԱ ՇՉՈՒԿԻՆԱ
41 տարեկան, Օրիֆլեյմի առաջատար գործընկեր
«Երբ ես 25 տարեկան էի, ավելի վատ տեսք ունեի, քան հիմա: Իմ զգացողությամբ հիմա 25-28 տարեկան եմ: Թվերով իհարկե մի փոքր ավելի մեծ եմ, սակայն դա ինձ համար նշանակություն չունի: Ես տարիքային կարծրատիպեր չունեմ: Նույնիսկ այն ճնշումը, որ շրջապատիս մարդիկ գործադրում էին ինձ վրա, օրինակ՝ երեխայի ծնվելուց ի վեր, ինձ համար էական չէր: Եթե ցանկանամ, ինձ ոչինչ չի կանգնեցնի, նույնիսկ իմ ու երեխաներիս միջև 20 տարվա տարբերությունը:
Տարիքի հետ, իհարկե, տեղի են ունենում որոշակի փոփխություններ: Առաջին անգամ 35 տարեկանում ես զգացի, որ ինչ-որ բան փոխվել է: 40-ին մոտ արդեն տեսողությունդ, մազերիդ վիճակն է վատանում: Սակայն դա անմիջականորեն կախված է կենսակերպից:
Եթե հավատարիմ մնալ «գեղեցկություն ներսից» գաղափարախոսությանը՝ սպորտ, սնունդ, դրական մտքեր, ապա կարելի է 5 կամ նույնիսկ 10 տարով երիտասարդանալ: Այն իրոք աշխատում է, սեփական փորձից եմ ասում: Նույնիսկ դեմքի պլաստիկան այնքան չի օգնում, որքան սպորտը:
Այժմ ինձ համար այն փուլն է, երբ ցանկանում ես անձնական հաջողության նշաձողը բարձրացնել: Սակայն դա կապված չէ տարիքի հետ, այն ներքին զգացողություն է: Նախկին նպատակներս ես համարում եմ լիարժեք իրականացված»:
ՏԱՏՅԱՆԱ ՆԵԿԼՅՈՒԴՈՎԱ
61 տարեկան, մոդել
«Ես միշտ ներկայանում եմ այսպես. Տատյանա Նեկլյուդովա, 61 տարեկան, երկու երեխաների մայր, երեք թոռնիկների տատիկ և համատեղությամբ՝ մոդել: Մոդել ես դարձա 59 տարեկանում: Մինչ այդ ես չէի սիրում նկարվել, ինձ գեղեցիկ չէի համարում: Նկարահանումներից և ֆոտոսեսիաներից հետո ինքս իմ հանդեպ վերաբերմունքը դրական կերպով փոխվեց, ես ազատագրվեցի:
Ներքնազգեստի նկարահանումներից հետո որոշ օգտատերեր նման մեկնաբանությունների էին թողել. «Ի՞նչ գործ ունի այստեղ այս տատիկը, ժամանակն է, որ նա այն աշխարհի մասին մտածի, իսկ նա ներքնազգեստ է գովազդում»: Իհարկե դրանք եզակի դեպքեր էին: Ռուսաստանում դա նոր նախադեպ էր, երբ իմ տարիքի կինը նկարահանվում էր ներքնազգեստի գովազդում: Մենք փոքրիկ հեղափոխություն արեցինք: Հետին թվով մտածում եմ. «Աստված իմ, ի՛նչ արկածախնդրություն էր»: Սակայն ուրախ եմ, որ այդպիսի փորձ ձեռք բերեցի:
Մի անգամ իմ չմշակված նկարն Ինստագրամում 3000 լայք հավաքեց: Իսկ գործակալության գործընկերների հետ մեր նկարը հրապարակեց հանրահայտ ամերիկյան նորաձևության ամսագրերից մեկը՝ նշելով, որ մեր օրինակով մենք փոխում ենք գեղեցկության և տարիքի մասին պատկերացումները Ռուսաստանում:
Վստահաբար ես ինձ 60 տարեկան չեմ զգում: Ես երիտասարդ եմ, առույգ, յոգայով, սկանդինավյան քայլքով եմ զբաղվում, թոռնիկիս հետ եմ շատ զբոսնում, հեծանիվ եմ քշում, առողջ կենսակերպ եմ վարում: Ինձ դուր է գալիս իմ արտաքինը, ես սիրում եմ իմ մարմինը: Ավելին, հիմա ես ինձ ավելի եմ դուր գալիս, քան երիտասարդ տարիներին: Չեմ կարծում, թե երիտասարդությունն անցնում է տարիքի հետ, այն պարզապես այլ կերպարանք է ստանում»:
