Սինգապուր
Եթե շոգը և բարձր խոնավությունը քեզ չեն վախեցնում՝ ուղևորվի՛ր Սինգապուր: Այն կատարյալ հանգստի համար իդեալական վայր է: Չափավոր ռիթմեր, ներքին պարզ նավիգացիա, տրանսպորտ, որի աշխատանքով կարող ես իմանալ ու ճշտել ժամը: Այստեղ քեզ կզգաս հարմարավետ, ինչպես տանը: Այստեղ է գտնվում աշխարհի ամենագեղեցիկ բուսաբանական այգիներից մեկը՝ 74 հեկտար բնականորեն ջրվող մարգագետիններով, հազվագյուտ ծաղիկներով և իրենց հարթությամբ փայլող լճերով, ու այս ամենը՝ ՅՈՒՆԵՍԿՕ-ի պաշտպանության ներքո: Տեղի բնակիչները տասը կրոնի են դավանում, որի շնորհիվ այստեղ բազմաթիվ գեղեցիկ տաճարներ կան: Խորհուրդ ենք տալիս այցելել դրանցից գեթ մեկը, օրինակ՝ Կոնգ-Մէն-Սան-Կար-Սի վանքը, որը Սինգապուրի խոշորագույն բուդդայական վանքն է: Այցելիր նաև տեղի լողափեր: Իսկ տեղական խոհանոցին ավելի լավ է ծանոթանաս չինական թաղամասում կամ ցանկացած առևտրի կենտրոնի ֆուդկորտում:
Կիպրոս
Իսկ եթե ուզում ես ծով և էկզոտիկա՝ ավելի մեղմ կլիմայով, ուղևորվի՛ր դայվինգ-շրջագայության՝ կիպրական ծովափի շուրջ: Ամռանն այստեղ անտանելի շոգ է, իսկ ահա աշնանն ու գարնանը վայելելու իսկական ժամանակն է: Խաղաղ Լառնակա, ակումբային Աիյա-Նապա և կամ մայրաքաղաքային Լիմասոլ՝ ընտրի՛ր քաղաքն՝ ըստ քո ճաշակի և քեզ անհրաժեշտ մթնոլորտի: Ի՞նչ կարելի է անել Կիպրոսում: Զբոսնել հին քաղաքի ոլորաններով, վայելել մաքրամաքուր ծովը, ուսումնասիրել ճարտարապետությունը, տեսնել պեղված հնագույն գերեզմանները: Խորհուրդ ենք տալիս այցելել Օմոդոս: Այն լեռնային գյուղ է, որը հայտնի է իր գինիներով: 2016 թվականին հենց այստեղ է անցկացվել Օրիֆլեյմի «Ոսկյա կոնֆերանսը»:
Պալմա դե Մալյորկա
Հանգստացի՛ր թագավորական ոճով: Այս տարի, բացի համաշխարհային շոու-բիզնեսի աստղերից և իսպանական թագավորական ընտանիքից, Մալյորկայում հիանալի ժամանակ կանցկացնեն Օրիֆլեյմի ուժեղագույն առաջնորդները՝ 2019 թվականի «Ոսկյա կոնֆերանսի» շրջանակներում: Անելիքների ցանկում են՝ ջրվեժներով հիանալը, La Reversa ազգային պարկի էկզոտիկ կենդանիներին տեսնելը, Ֆորմենտոր հրվանդանի մոտ լուսանկարվելը և ժամանակակից իսպանական արվեստի բոլոր թանգարաններն այցելելը:
Ստոկհոլմ
Շվեդիայի մայրաքաղաքը ներառում է 14 կղզի, որոնք միմյանց հետ կապված են 57 կամրջով: Այստեղ դու չընդհատվող գեղագիտական հաճույք կստանաս ճարտարապետությունից և դիզայնից՝ սկանդինավյան չափավորության և մեծ քաղաքի ռիթմերի կախարդական զուգակցում: Զբոսնի՛ր հին քաղաքով, Ericcson Globe շենքում նստի՛ր գեղեցիկ համայնապատկեր բացահայտող վերելակը, այցելի՛ր Նոբելի թանգարան: Լայֆհակ՝ ակտիվության սիրահարների համար: Կարելի է կայակ վարձակալել և Մելարեն լճով լողալով՝ ուսումնասիրել բոլոր կղզիները: Ստոկհոլմում կենտրոնացված են ամենամեծ թվով արվեստի պատկերասրահները: Ընտրի՛ր ցանկացածը, սակայն եթե ժամանակ չունես, խորհուրդ ենք տալիս սկսել ամենամեծից՝ Moderna Museet-ից: Երբ սովածանաս, փողոցում համարձակորեն մոտեցի՛ր ցանկացած սնման կետի: Իսկ շվեդական իսկական խոհանոցը քեզ է սպասում Ostermalmshallen փակ շուկայում: 2012 թվականի Օրիֆլեյմի «Ոսկյա կոնֆերանսի» ժամանակ մեզ պատվեց Շվեդիայի թագուհի Սիլվիան: Խորհուրդ ենք տալիս նաև այցելել թագուհու բնակավայր «Թագավորական պալատը»:
Քեյփթաուն
Հարավային Աֆրիկայի գլխավոր քաղաքը կզարմացնի քեզ վայրի բնության մոլեգնությամբ: Քաղաքի կենտրոնը կարելի է անցնել կես օրում, այդ պատճառով խորհուրդ ենք տալիս ավտոմեքենա վարձել և անցնել «Կապի թերակղզու» ամբողջ տարածքով: Այստեղ նայելու շատ բան կա: Բարձրացի'ր «Սեղանաձև լեռը», որը հայտնի է իր հարթ գագաթով, Կիրստենբոշ ազգային բուսաբանական այգում զբոսնի'ր ծառերի գագաթներից բարձր կախովի կամրջով, փորձի՛ր հայացք գցել Անտարկտիդային՝ «Բարի հույսի» հրվանդանից, և լուսանկարվի՛ր պինգվինների հետ «Գլաքարերի լողափին»: Սթրիթֆուդը քեզ կհիասթափեցնի, այստեղ սիրում են սովորական բուրգերներ և կարտոֆիլի ֆրի, իսկ տեղական սնունդը փորձելու համար այցելի՛ր սովորական սուպերմարկետ:
Լոս-Անջելես
Կալիֆորնիայի մայրաքաղաքի գիդերը դրա մասին երկու կամ երեք էջ կգրեին: Հնարավորություններն ու տպավորություններն անսահմանափակ են: Ինչի՞ց սկսել: Գրեթե 120 կմ երկարությամբ շքեղ լողափեր, հարյուրավոր արվեստի պատկերասրահներ, փառքի վայրեր՝ կինոյի սիրահարների համար, և աշխարհի ամենատարբեր խոհանոցների ուտեստներն առաջարկող լավագույն ռեստորաններ: Ընտրի՛ր հանգստիդ ուղղությունն ու մանրամասն ծրագիր կազմիր: Այն, ինչ ուղղակի պարտավոր ես տեսնել՝ Skyspace քաղաքի բարձր երկնաքերի վրայի դիտահարթակն է, Գրիֆին աստղադիտարանը, որն առաջարկում է անվճար աստղադիտակներ, և որից քաղաքի հիանալի տեսարան է բացվում, Սանտա-Մոնիկա լողափը և LACMA թանգարանը:
Սիդնեյ
Արևոտ լողափեր ու լավագույն վայրեր՝ սերֆինգի համար, փռված ծառեր՝ «Թագավորական բուսաբանական այգում», հանրահայտ օպերային թատրոնը և «Երկնագույն սարերը»: Սիդնեյը զարմացնում է գույների հակադրությամբ: Ուզո՞ւմ ես խենթանալ վայրի բնության գեղեցկությունից: Ծանոթացի՛ր Featherdale պարկի կոալաների հետ: Սիրո՞ւմ ես էքստրիմ: Անցի՛ր Հարբոր-Բրիջի կամարով, որն աշխարհի ամենամեծ պողպատե կամուրջներից է: Անպայման հանգստացի՛ր հարմարավետ Մենլիում և այցելի՛ր Բոնդի լողափ:
Տոկիո
Տոկիոյի յուրաքանչյուր թաղամաս իրավամբ կարելի է առանձին քաղաք համարել: Եթե սիրում ես տաճարներ և ցանկանում ես տեսնել, թե ինչպես են ապրում իսկական գեյշաները, այցելի՛ր Ասակուսու: Շոփինգի համար այցելի՛ր Գինզու, իսկ ճապոնական փողոցային նորաձևությունը կարող ես բացահայտել Հարաջուկույում: Հնագույն տաճարներ, կայսերական պալատ, երկնաքերներ, դիտահարթակներ... Տոկիոյով կարելի է թափառել առանց քարտեզի և հատուկ ծրագրի: Մեր «Ադամանդե տնօրեն» Նատալյա Պասիչնիկն ուղղակի սիրահարվել էր ծաղկող սակուրային: «Մենք Տոկիո էինք ժամանել տարվա ամենահիանալի ժամանակ, ես ամբողջ կյանքի ընթացքում կհիշեմ դա»:
Մայամի
Ֆլորիդա նահանգի գլխավոր հանգստավայրի աստղային վայրերից մեկը հանրահայտ Մայամի Բիչն է՝ շքեղ խանութներով, գիշերային ակումբներով, ձյունաճերմակ ավազով: Մի՛ սահմանափակվիր լողափով: Զբոսնի՛ր գունագեղ Coconut Grove ուսանողական թաղամասով, այցելի՛ր ժամանակակից արվեստի բազմաթիվ թանգարաններից որևէ մեկը, պարի՛ր լատինական ռիթմերի տակ ցանկացած գիշերային ակումբում, Վիսկայա վիլլայում տե՛ս հնությունների հավաքածուները: Արվեստի ամենատպավորիչ հարթակներից մեկը՝ Պերեզ արվեստների թանգարանն է, որը կառուցվել է Herzog & de Meuron ֆիրմայի շվեյցարացի ճարտարապետների և դիզայներների կողմից:
Մալթա
Մալթայի պատմությանը լավագույնս ծանոթանալու վայրը Մդինան է՝ փոքր քաղաք 300 բնակչով, որը հիշեցնում է թանգարան բաց երկնքի տակ: Այստեղ նկարահանվել է աղմկահարույց «Գահերի խաղը» հեռուստասերիալի մի քանի սերիա: Միստիկայի սիրահարներին խորհուրդ ենք տալիս այցելել Հալ-Սաֆլիենի՝ 5000 տարվա հնության մեգալիթյան ստորգետնյա սրբավայր: Շոփինգի համար ավելի լավ է մեկնել մայրաքաղաք Վալետտա: 2010 թվականին Օրիֆլեյմի «Ոսկյա կոնֆերանսի» համար քաղաքի գլխավոր հրապարակը հատուկ ձևավորվել էր Օրիֆլեյմի առաջնորդների հանդիպման համար: Նրանք ընթրում և իրենց հաջողությունն էին տոնում քաղաքի հենց սրտում:
