Դանիել Կանեման՝ «Մտածի՛ր դանդաղ, լուծի՛ր արագ»
Մեր գործողությունները և արարքները սահմանվում են մեր մտքերով: Սակայն արդյո՞ք մենք կարող ենք մշտապես կառավարել մեր միտքը: Նոբելյան դափնեկիր Դանիել Կանեմանը բացատրում է՝ ինչու ենք երբեմն կատարում ոչ ռացիոնալ արարքներ և ինչպես ենք մենք ընդունում սխալ որոշումներ:
Յուրի Միխայլյուկ. «Ինձ համար շատ կարևոր գիրք: Մենք հաճախ ենք գործում ոչ ռացիոնալ, հատկապես՝ մանրուքներում: Մեզ վրա ազդում է տեղեկատվությունը, որը վերջերս ենք ստացել, էմոցիոնալ այն վիճակը, որում այդ պահին գտնվում ենք, ինչպես նաև այն, թե երբ ենք վերջին անգամ սնունդ ընդունել: Դանիել Կանեմանը և իր գործընկեր Ամոս Տվերսկին վերլուծել են մարդկային ուղեղն ու պարզել թեորեմ՝ ինչպես է մարդը մտածում, ինչպես է աշխատում ուղեղը: Դա ինձ տվեց կարևոր իմացություն մարդու մտածելակերպի վերաբերյալ»:
Ջառեդ Դայմոնդ «Հրացաններ, մանրէներ և պողպատ»
Հիմք ընդունելով աշխարհագրության, կենսաբանության, կենդանաբանության, միկրոկենսաբանության, լինգվիստիկայի և այլ գիտությունների տվյալները, Դայմոնդը համոզիչ ապացուցում է, որ երկրագնդի տարբեր մասերում զարգացման ասիմետրիկությունը պատահական չէ և հիմնվում է բազմաթիվ բնական գործոնների վրա:
Յուրի Միխայլյուկ. «Մարդաբան Ջառեդ Դայմոնդը բացատրում է, թե ինչու են որոշ ժողովուրդներ գտնվում տնտեսական զարգացման բարձր մակարդակի վրա, իսկ մյուսները մինչ օրս դեռ հագուստի փոխարեն ծածկվում են մորթիներով: Հասկանալու համար, թե ինչպես է աշխատում բիզնեսը, պետք է ընկալել՝ ինչպես է կառուցված մարդը: Այս գիրքը տալիս է ուժեղագույն պատկերացում այն մասին, թե ինչու են մարդիկ վարվում այս կամ այն կերպ: Սա կարևոր գիտելիք է, քանի որ ամեն օր որակապես ճիշտ լուծումներ տալու դեպքում դրանք կուտակվում են և տալիս որակով արդյունք, օրինակ՝ քո բիզնեսի կամ կազմակերպության համար»:
Ռիչարդ Կոխ՝ «80/20 սկզբունքը»
Հրապարակման առաջին օրից 14 տարի անց «80/20 սկզբունքը» գիրքը դարձավ գործնական գրականության դասականներից և համաշխարհային բեսթսելեր: Գրքի հեղինակը, որը հաջողակ բիզնեսմեն է և «ծույլ ձեռնարկատեր» (այսպես է ինքն իրեն անվանում Ռիչարդ Կոխը), պատմում է այն մասին՝ ինչպես հասնել մեծ հաջողության՝ վատնելով քիչ գումար, ուժ, ժամանակ և ռեսուրսներ:
Յուրի Միխայլյուկ. «Սա բոլոր գրքերից ամենա «ձեռնարկատիրականն» է: Այստեղ խոսվում է այն մասին, թե ինչպես է Պարետո սկզբունքը ճեղքում մեր ողջ կյանքը, այսինքն՝ քիչ ջանքերի գործադրումը, որպես կանոն, հանգեցնում է անհամաչափ մեծ քանակությամբ արդյունքների. ջանքերի 20 տոկոսի կիրառումը հանգեցնում է 80 տոկոս արդյունքի, իսկ մնացածով զբաղվելու անհրաժեշտություն չկա:
Սա շատ կարևոր սկզբունք է, տոկոսների կապիտալիզացիայի սկզբունքի «ազգականը», երբ բանկի կուտակային տոկոսը ամեն տարի կուտակվում է: Այս տոկոսը աշխարհի 8-րդ հրաշալիքն է. ով ըմբռնում է դրա աշխատանքի սկզբունքը, նա էլ օգտվում է, ով չի հասկանում, նա էլ վճարում է»:
Սթիվեն Ռ. Կովի՝ «Բարձր արդյունավետությամբ մարդկանց յոթ հմտություն»
Այս գիրքը համաշխարհային բեսթսելեր է, անձնային զարգացման թեմայով №1 աշխատանքը: Այն մեծ ազդեցություն է ունեցել միլիոնավոր մարդկանց կյանքի վրա՝ ներառյալ Բիլ Քլինթոնը, Լարի Քինգը և Սթիվեն Ֆորբսը: Fortune 500 ցուցակում ներառված համաշխարհային խոշորագույն կորպորացիաների կեսը իրենց պարտք են համարում աշխատակիցներին ծանոթացնել արդյունավետության փիլիսոփայությանը, որը շարադրված է ՅՈԹ ՀՄՏՈՒԹՅՈՒՆՆԵՐՈՎ:
Յուրի Միխայլյուկ. «Սա ժանրի դասականն է: Գիրքը տալիս է լավ և ծանրակշիռ հիմք՝ կենսական հիմնարար հմտությունները (որոնք ոչ միշտ են վերաբերվում հենց բիզնեսին) հասկանալու համար: Երբ թողարկվեց ռուսական թարգմանությունը, ես գնեցի 34 օրինակ (հիշում եմ՝ ինչպես այսօր) և բաժանեցի բոլոր ծանոթներիս: Հիանալի գիրք է»:
Նասիմ Թալիբ՝ «Հակաթուլություն» (Antifragile)
ՀԱԿԱԹՈՒԼՈՒԹՅՈՒՆ` յուրօրինակ գիրք. Այն պատմում է մարդկանց, համակարգերի առանցքային հատկությունների մասին, որակ, որը մինչ օրս չունի իր անունը: Աշխարհ, որտեղ իշխում է անորոշությունը, չկա ավելի ցանկալի բան, քան հակաթուլությունը, այսինքն՝ ունակություն կյանքի քաոսի հետ բախվելուց հետո ոչ միայն մնալ անվնաս, այլև դառնալ ավելի լավը՝ զարգանալ:
Յուրի Միխայլյուկ. «Իմ տարվածությունը: Ես մասնակցել եմ Նասիմ Թալիբի վերջերս Մոսկվայում կայացած սեմինարին: Մեծ թեմա է, կիսափիլիսոփայական:
Նրա ընդհանուր հայեցակարգը՝ մեր կյանքը կառավարում են սև կարապները՝ շատ հազվադեպ ու անկանխատեսելի իրադարձություններ, որոնք փոխում են մեր կյանքը: Օրինակ՝ 2008 թ.-ի ճգնաժամը, ոչ ոք չէր կանխատեսում, և այն ամբողջությամբ փոխեց մեր կյանքը: Շատ լավ գիրք, ես այն այս պահին վերընթերցում եմ: Այն այնքան բազմաշերտ է, որ ես միշտ պահում եմ այն ինձ մոտ: Չնայած այն հանգամանքին, որ գրքին բավականին լավ եմ ծանոթ, բացում եմ այն ինքնաթիռում և վերընթերցում՝ կարևոր ներըմբռնման գալու համար»:
Ռոբերտ Տ Կիոսակի՝ «Հարուստ հայր, խեղճ հայր»
Հեղինակը վստահ է, որ ամերիկյան դպրոցում երեխաները չեն ստանում փողի վերաբերյալ անհրաժեշտ գիտելիքներ, և հետո ողջ կյանքի ընթացքում աշխատում են գումար վաստակելու համար, փոխարենը ստիպեն գումարն աշխատի իրենց համար: Լայն շրջանակի ընթերցողների համար:
Յուրի Միխայլյուկ. «Սա, կարելի է ասել, ձեռներեցության կարևորագույն գրքերից է: Մեր առաջնորդներից շատերն այն գիտեն և հաճախ են մեջբերում: Համարվում է, որ Կիոսակիի գլխավոր թեման հետևյալն է. ավելի լավ է լինել ձեռներեց, քան վարձու աշխատող: Լավ գիրք է, եթե այն կարդայի իմ պատանեկության տարիներին, ապա շատ հնարավոր է հիմա չլինեի աշխատակից, այլ լինեի ձեռներեց: Չնայած՝ ով գիտե»:
