Վայրի բնությունը քաղաքի առանձնահատկություններից մեկն է

Քեյփթաունի հինգ միլիոն բնակիչները համերաշխ ապրում են քաղաքային վայրի բնության ներկայացուցիչների հետ. ֆլամինգոներ, կապսկյան ծովառյուծներ, Չակմա բաբուիններ, նրբագեղ այծքաղեր (Հարավային Աֆրիկայի ազգային խորհրդանիշը) և այլ հազվագյուտ տեսակներ։ Քաղաքային ծովախորշում կետեր են ապրում, այդ թվում՝ սապատավոր ու հարավային, և նրանցով անվերջ կարելի է զմայլվել։

Ցանկանու՞մ ես վառ տպավորություններ և իրական հույզեր՝ ինչպես մանուկ հասակում

Բոլդերս լողափում լողա աֆրիկյան պինգվինների խմբի հետ։ Բացառիկ տեղ է, որտեղ կարելի է մոտիկից հետևել իրենց բնական միջավայրում զբոսանքի ելած աֆրիկյան հազվագյուտ պինգվիններին։

Հետևիր ափամերձ ջրերում ազատ խայտող ծովառյուծներին։ Նախանձելի կերակրացանկ ունեն. ձկները, կաղամարներն ու ծովախեցգետինները նրանց ամենօրյա ճաշացանկն է։ Նրանց կարելի է տեսնել Կալկբայ և Հաութ-Բեյ ծովախորշերում, Վիկտորիայի և Ալբերտի ծովափում, ու ավելի մոտիկից ծանոթանալ՝ այդ ջրերում սուզվելով։ Բայց զգույշ եղիր. չնայած աշխույժ և բարյացակամ ծովառյուծները բավականին մարդամոտ են, բայց շատ խոշորամարմին են և ուժեղ. արուների քաշը հասնում է մինչև 300 կգ։

Ֆլամինգոների երամը հաճախ է հյուրընկալվում Քեյփթաունում։ Ամենատարածված տեսակի՝ «մեծ ֆլամինգոների» երկարությունը կարող է հասնել 130-160 սմ։ Պերճաշուք փետրավորները հիմնականում բնակվում են Աֆրիկայի հյուսիսում, բայց նրանք՝ մարդկանց պես, սիրում են արև ու հավաքվում են Քեյփթաունում վայելելու հրաշալի եղանակը։ Ժամանակին այս նրբագեղ թռչունները հազվագյուտ էին, բայց հիմա գրավել են Քեյփթաունի ծովախորշերի մեծ մասը։ Նրանց կարելի է հանդիպել Փայնլենդսի մերձակայքում՝ Սև գետի մոտ, Միլներտոնի ծովալճակում և Քոմետժիում։