Խնդիր․ չեմ կարողանում ստանալ հավասար աղեղնաձև սլաքներ
Լուծում․ վերցրու սքոչի փոքր հատված և մի քանի անգամ կպցրու ձեռքիդ ափին, որպեսզի այն որոշ չափով կորցնի իր կպչունությունը։ Այնուհետև այն դեմքի մաշկին կպցրու այնպես, որ ստացվի ստորին կոպից դեպի քունք տանող ուղիղ գիծ։ Այս ուղով էլ կանցնի քո աղեղնաձև սլաքը։ Այժմ հեղուկ գծաներկի օգնությամբ անցիր վերին թարթիչների գծի ուղղությամբ և շարունակիր սքոչի վրայով՝ օգտագործելով այն՝ որպես քանոն։ Թո՛ղ գծաներկը չորանա, հեռացրու սքոչը։ Կատարյալ է։
Խնդիր․ դեմքն ուրվագծելուց հետո նմանվում եմ ծաղրածուի։
Լուծում. Առաջին հերթին թուլ տուր հիշեցնել, որ ուրվագծումը հատուկ տեխնիկա է, որը կիրառում են պրոֆեսիոնալները։ Այն անհնար է սովորել մեկ երեկոյի ընթացքում։ Ստվերագծում, ստվերագծում ու կրկին ստվերագծում։ Երանգային միջոցը այտոսկրերին և ծնոտին տարածելուց հետո վերցրու սպունգը և անցիր ստվերագծման։ Նույնը վերաբերում է լուսարձակող միջոցին, այն անպայման անհրաժեշտ է տարածել դիմահարդարման փափուկ վրձնի օգնությամբ, ծայրահեղ դեպքում՝ մաքուր մատներով։
Խնդիր. ամեն անգամ թարթիչներիս սևաներկ տարածելիս փռշտում եմ։
Լուծում. Դա հնարավոր է։ Մի՛ մտահոգվիր։ Կարևորը՝ մի՛ շտապիր հեռացնել մաշկի վրա ներկված սևաներկը։ Այսպես դու միայն կփչացնես դիմահարդարումը։ Թո՛ղ այն չորանա, որից հետո քողարկիչի փոքրիկ վրձնի օգնությամբ զգուշորեն հեռացրու դեմքի վրա նկատվող սևաներկի մասնիկները։
Խնդիր. հոնքերս ունեն արհեստական տեսք։
Լուծում. Խիտ, ուշադրություն գրավող հոնքերը նորաձև են, սակայն նմանատիպ արդյունք ստանալն այնքան էլ հեշտ չէ։ Հոնքերի բնական տեսքն ապահովելու համար անհրաժեշտ է խուսափել սկսնակի տիպիկ սխալներից։ Առաջին հերթին հոնքերի ստորին սահմանը եզրագծելիս պահպանիր զգուշություն։ Այն չպետք է լինի քառակուսի։ Հետևիր մազերի բնական աճի ուղղությանը՝ թեթևակի շտկելով այն մատիտի կամ շտկող հավաքածուի օգնությամբ։ Երկրորդը՝ մի՛ նկարիր ավելորդ գծեր։ Հոնքի ավարտվող սահմանը հասկանալու համար՝ վերցրու մատիտ և տար ուղիղ գիծ՝ քթածակերից մինչև աչքի արտաքին սահման։ Կատարյալ հոնքը չպետք է անցնի այդ սահմանը։ Երրորդը՝ մի՛ մոռացիր, որ անգամ ամենախնամված հոնքերը պետք է կրկնեն քո հոնքերի բնական գույնը։
Խնդիր․ Ինձ մոտ կարմրում է քթի շուրջ հատվածը։
Լուծում. Որպես կանոն, դա կատարվում է հաճախակի քիթը սրբելու դեպքում։ Փորձիր խուսափել այդ գործողությունը կատարելուց, մենք վստահ ենք, որ կգտնես որևէ այլ տարբերակ։ Քթի շուրջ հատվածը կարմրում է նաև ջերմաստիճանի կտրուկ փոփոխությունների դեպքում։ Այդ դեպքում քեզ կօգնի ճիշտ խնամքը՝ նուրբ մաքրող միջոց, հագեցած ցերեկային քսուք կամ յուղ։ Այն դեպքում, երբ խնամքն էլ չի օգնում, օգտագործիր քողարկիչ և դիմափոշի, որոնց երանգը հնարավորինս մոտ է քո մաշկին։
