Մաշկի երեք տարիք

Հորմոնային ֆոնի փոփոխությունները մաշկի վրա լուրջ ազդեցություն են թողնում։ Այս պնդումը հատկապես արդի է կնոջ կյանքի երեք կարևորագույն շրջանների ՝ սեռահասունացման, հղիության և դաշտանադադարի համար։

1. ՍԵՌԱՀԱՍՈՒՆԱՑՈՒՄ

Հորմոնային առաջին լուրջ փոթորիկը կատարվում է հենց այս տարիքում։ Օրգանիզմը սկսում է արտադրել «կանացի» էստրոգեն հորմոնը և «տղամարդու» հորմոններ-անդրոգեններ, որոնց թվում հատկապես աչքի է ընկնում մեծ ծավալով արտադրավող տեստոստերոնը։ Եվ սա, իհարկե, անդրադառնում է մաշկի վրա։

Էստրոգենը, որը մասնակցում է էլաստինի և կոլագենի սինթեզին, մաշկի հետ կատարում է իրական հրաշքներ։ Էստրոգենի բավարար քանակության դեպքում մաշկը դառնում է առաձգական և խոնավացված, իսկ նրա մակերեսը՝ հարթ։ Թվում է՝ ամեն ինչ հիասքանչ է, ինչու են դեռահասներն ունենում այսքան մեծ քանակությամբ խնդիրներ՝ կապված հենց մաշկի հետ։ Պատճառն այն է, որ էստրոգենը  միակ հորմոնը չէ, որն այս տարիքում ունի իր մեծ դերակատարությունը։

Եթե էստրոգենը մաշկի վրա թողնում է դրական ազդեցություն, ապա տեստոստերոնը՝ հակառակը։ Տեստոստերոնի բարձր մակարդակը հանգեցնում է ծակոտիների լայնանալուն (դրանք տեսողաբար դառնում են ավելի խոշոր), ինչպես նաև մաշկի սեբումի մեծ քանակությամբ արտադրվելուն։ Իսկ դաշտանաշրջանում, որը նաև սկսվում է սեռահասունացման շրջանում, հորմոնների մակարդակը մշտապես փոփոխվում է։ Սա նշանակում է, որ այն օրերը, երբ էստրոգենը գտնվում է իր գագաթնակետին, հերթափոխվում են նաև «տեստոստերոնային» օրերով։ Արդյունքում խցանված ֆոլեկուլները պահում են սեբումի ավելորդ քանակը, ինչն անխուսափելիորեն հանգեցնում է ցանի առաջացմանը, իսկ երբեմն նաև ավելի լուրջ խնդիրների։

Ի՞նչ կարելի է անել օրգանիզմում հորմոնային վերակառուցման և մաշկի վիճակի վրա դրա ազդեցության հետևանքով առաջացած խնդիրներից ազատվելու համար։ Առաջինը՝ մաքրել մաշկը՝ դրա մակերեսից հեռացնելով ավելորդ սեբումն ու աղտոտվածությունը։ Երկրորդը՝ օգտագործել շերտազատող միջոցներ, որոնք կօգնեն մաքրել խցանված մաշկը։ Երրորդը՝ օգտագործել թեթև բանաձևերով (օրիանկ՝ գելեր) խոնավացնող միջոցներ։ Տարօրինակ կարող է թվալ՝ խոնավացնել մաշկը, որն արդեն յուղոտ տեսք ունի, սակայն սեբումը մաշկի խոնավության հետ չունի ոչ մի ընդհանրություն։ Pure Skin շարքի միջոցները կոչված են լուծել երիտասարդ մաշկի խնդիրները։ Մանրամասն կարող ես կարդալ «Արդյո՞ք հեշտ է լինել երիտասարդ» հոդվածում։

2. ՀՂԻՈՒԹՅՈՒՆ

Հղիության ընթացքում կնոջ օրգանիզմը ենթարկվում է ուժեղ հորմոնային վերակառուցման։ Սակայն այս պրոցեսը կանանց վրա տարբեր կերպ է անդրադառնում։ Բախտավոր լինելու դեպքում էստրոգենի արտանետումը հանգեցնում է կանացի գեղեցկության զարթոնքի՝ մազերի ու մաշկի վիճակն էականորեն բարելավվում է։

Իսկ բոլոր նրանք, ովքեր չեն հայտնվել «երջանիկների» շարքում, բախվում են մի շարք խնդիրների հետ։ Մուգ կետիկներ, չոր հատվածներ և մաշկի գույնի փոփոխություն՝ սրանք այդ խնդիրներից ամենատարածվածն են։ Գույնի փոփոխությունները կապված են մեծ քանակությամբ մելանինի (արևային ճառագայթներից մեր բնական պաշտպանությունը) արտադրության հետ։ Որքան մաշկի մեջ շատ է մելանինը, այնքան  նկատելի է մաշկի գույնի փոփոխությունը։ Այսպիսի փոփոխության օրինակներից մեկը մելազման է, որն արտահայտվում է մաշկի բաց հատվածներում (օրինակ՝ ճակատին, քթին, այտերին) մուգ կետիկների առաջացմամբ։ Երբեմն այս բծերն անվանում են «հղիության դիմակ»։

Ի՞նչ կարելի է անել այս փոփոխությունները առավելագույնս նվազեցնելու համար։ Առաջին հերթին՝ չմոռանալ արևապաշտպան միջոցների կարևորության մասին։ Դրանք պետք է միշտ օգտագործել, տարածել խոնավացնող քսուքից առաջ, փնտրիր ՈՒՄ զտիչներ պարունակող կոսմետիկա և խնամքի միջոցներ։ Եթե մաշկդ սկսել է փոխել իր երանգը, մենք խորհուրդ ենք տալիս Optimals Even Out շարքի միջոցները, որոնք կանխարգելում և կրճատում են տհաճ  հետևանքները։

3. ԴԱՇՏԱՆԱԴԱԴԱՐ

Կնոջ կյանքի երրորդ շրջանը, երբ կատարվում է հորմոնային վերակառուցում՝ դաշտանադադարն է։ Այս շրջանում էստրոգենի և պրոգեստերոնի մակարդակը էականորեն նվազում է։ Ասում են՝ այս ժամանակը հասունացման հակառակն է։ Մասամբ այս նկատառումն արդարացի է։

Ինչպես և հասունացման շրջանում, որոշ կանայք բախվում են մաշկի վրա ցանի առաջացման խնդրի հետ։ Սա պայմանավորված է հորմոնային ֆոնի կտրուկ փոփոխություններով։ Էստրոգենի մակարդակը նվազում է, և այն այլևս չի կարողանում հաշվեկշռել տեստոստերոնի ազդեցությունը, որն էլ իր հերթին հանգեցնում է խցանված ծակոտիների առաջանալուն, մազի ֆոլեկուլներում սեբումի կուտակվելուն և մաշկի չորությանը։ Մյուս կողմից՝ այս շրջանում ակնեն կարող է հանգեցնել բորբոքվածությունների, քանի որ հակաբորբոքային հատկություններ ունեցող էստրոգենը, այլևս չի կարող պաշտպանել քեզ վարակներից։ Այս շրջանին բնորոշ է նաև մելազմայի առաջացումը՝ արևային ճառագայթների ազդեցության տարիներն ունենում են կումուլյատիվ էֆեկտ, և փոքրիկ բծերը վերածվում են հասուն տարիքին բնորոշ գունակային փոփոխության։

Սակայն այս ամենը չի նշանակում, որ պետք է դադարեցնել մաշկի խնամքի գործընթացը և մնալ ճակատագրի հեգնանքին։ Հասուն մաշկը խնամելու լավագույն միջոցը հատուկ այս տարիքի համար ստեղծված միջոցների օգտագործումն է։ Դրանք լուծում են այս տարիքին բնորոշ խնդիրները՝ վերականգնում կոլագենի մակարդակը, խոչընդոտում առաձգականության կորստին, հստակեցնում դեմքի ուրվագծերը, հարթում կնճիռները և խոնավացնում։ Տարիքային խնամքի ևս մեկ կարևոր հանգամանք՝ պայքար մելանինի բարձր մակարդակի հետ։ NovAge ապրանքանիշի Time Restore շարքը պարունակում է Սոյայի գենիստեին և բույսերի ցողունային բջիջների մզվածք, որոնք ուղղված են հենց վերը թվարկված խնդիրները լուծելուն։

Եվ, բացի այդ, ճիշտ ընտրված համալիր խնամքը ցանկացած դեպքում կոչված է օգնել պայքարելու ցանի դեմ։ Ցանկացած տարիքում։

Տեքստ Ֆոտո Getty Images