ՍԽԱԼ #1․ ԱՊՐԵԼ ԱՆՑՅԱԼՈՎ
Որպես կանոն, մարդիկ գոհ չեն իրենց տարիքից և փորձում են ունենալ այն տեսքը, որն ունեին դեռ 10 տարի առաջ, սակայն հենց այդ պատճառով երևում են ավելի մեծահասակ։ Դրա փոխարեն հիշի՛ր, որ դիմահարդարման նպատակը քո բնական գեղեցկությունն ընդգծելն է։ Մի՛ չարաշահիր դիմահարդարման «ծանր» տեխնիկան՝ ստորին կոպի վրա սև գծաներկ, հանած հոնքեր, լայն քսած շուրթերի մատիտ, այս ամենը կավելացնի հավելյալ մի քանի տարի։
ՍԽԱԼ #2․ ՍԽԱԼ ԸՆՏՐԱԾ ԵՐԱՆԳԱՅԻՆ ՀԻՄՔ
Ծանր հիմքը կլցնի դիմախաղից առաջացած կնճիռները և տեսողաբար կմեծանի դրանք, այդ պատճառով տարիների ընթացքում ընտրի՛ր թեթև բաղադրությամբ խոնավացնող հիմքեր։ Չափից շատ երանգային հիմք օգտագործելու դեպքում, այն կմնա կնճիռների մեջ, հետևի՛ր քանակին։ Հիմքից հետո տարածիր փայլող դիմափոշու քիչ քանակություն։ Փայլող մաշկը միշտ ունի ավելի երիտասարդ տեսք, քան փայլատը։
ՍԽԱԼ #3. ՍՆԳՈՒՅՐԻ ՍԽԱԼ ԵՐԱՆԳ
Սնգույրը կարող է հաղորդել թարմ, շողացող տեսք, սակայն սխալ երանգի ընտրության դեպքում կհաղորդի ամբողջովին հակառակ արդյունք։ Խորհուրդ չենք տալիս օգտագործել շագանակագույն երանգով սնգույր, դրանք հաղորդում են մռայլ, և անգամ, կեղտոտ տեսք։ Դրա փոխարեն ուշադրություն դարձրու տաք, չեզոք և լուսարձակող դեղձագույն երանգներին։ Սա դեմքին երիտասարդ տեսք հազորդելու պարզագույն տարբերակն է։ Պարզապես տարածիր սնգույրի քիչ քանակություն այտերի «խնձորակներին»։
ՍԽԱԼ #4. ՓԱՅԼՈՎ ՍՏՎԵՐԱՆԵՐԿԵՐ
Խուսափիր փայլող ստվերաներկեր օգտագործելուց։ Իրենց կազմության պատճառով դրանք հակված են կուտակվել դիմախաղից առաջացած կնճիռների մեջ և տեսողաբար մեծացնել դրանք։ Երիտասարդ տարիքում դա ընդունելի է, սակայն տարիների հետ դա դառնում է պարզապես անընդունելի։ Մետաքսանման կամ փայլատ ստվերաներկերը շատ ավելի գեղեցիկ են։
ՍԽԱԼ #5. ՉԱՓԻՑ ՇԱՏ ՇՊԱՐՎԵԼԸ
Մի՛ չարաշահիր շպարը։ Որքան պարզ, այնքան լավ։ Լավ սևաներկ, խոնավացնող շպարի հիմք, դեղձագույն երանգով սնգույր և մաշկագույն երանգի շրթներկ։ Սա այն ամենն է, ինչ քեզ անհրաժեշտ է բնական, թարմ և գրավիչ տեսք ունենալու համար։ Մոռացի՛ր ծանր դիմահարդարման մասին։ Տարիների ընթացքում առավել կարևոր է դառնում այս սկզբունքը՝ «քիչ նշանակում է շատ»։
