1. Բամբակե բարձի երեսները փոխարինի՛ր մետաքսե բարձի երեսներով
Եթե անկողինդ առավոտյան մարտադաշտ է հիշեցնում, ուրեմն այս կետը քեզ համար է: Բամբակի հետ տրորվելը վնասում է մազերը՝ դրանք դառնում են չոր և կոտրատվող, էլեկտրականանում են, խճճվում, կորցնում փայլը: Իսկ ահա մետաքսը կարող է պահպանել ոչ միայն մազերի առողջ տեսքը, այլ նաև հոլիվուդյան խոպոպները: Եթե պառկել ես քնելու մազերդ հարդարված, առավոտյան դու ևս աստղային տեսք կունենաս:
2. Սանրվի՛ր
Մեկ օրում մազերը քիչ բան չեն տեսնում, և քնելուց առաջ կարևոր է դրանք լավ սանրել: Գիշերվա ընթացքում թեթևակի խճճված մազերը կարող են վերածվել ցավոտ քարկապների: Վերցրո՛ւ խիտ մազախավով խոզանակ և զգուշորեն սանրի՛ր մազերը՝ ծայրերից մինչև արմատները: Ավարտի՛ր այս գործընթացը գլխամաշկի թեթևակի մերսումով, որը կարող ես անել միևնույն խոզանակով կամ մատներով:
3. Դիմակ պատրաստի՛ր
Երբ մազերդ դժվար ժամանակներ են ունենում, կարող ես դրանց վրա սովորական կամ յուղային դիմակ դնել և թողնել, որ մնա ամբողջ գիշեր: Առավոտյան մազերդ պետք է լավ լվաս, և կստանաս փափուկ խոպոպներ: Իհարկե, այդպես հարմարավետության զգացում չես ունենա: Ավելի լավ է ուշադրություն դարձնես գիշերային խնամքի համար նախատեսված հատուկ միջոցներին: Դրանք չեն լղոզվի բարձի վրա, չեն տարածվի անկողնային սպիտակեղենի կամ զուգընկերոջդ վրա, իսկ առավոտյան ամենը լվալու կարիք չի լինի: Դու կարթնանաս միանգամից հարդարման համար պատրաստ մազերով: Այդպես պրակտիկ է: Մեզ դուր է գալիս Eleo գիշերային խնամքը՝ չորս արժեքավոր յուղերի համալիրով՝ արգանի, շաղգամի, վարդի և քամելիայի: Թեթև կառուցվածք և լիարժեք վերականգնում, մինչ դու քնած ես:
4. Չորացրո՛ւ ամբողջությամբ
Չի կարելի պառկել քնելու նույնիսկ թեթևակի խոնավ մազերով՝ այդպես կարթնանաս գլխիդ խատուտիկ-մազափնջով: Հաստ և կոշտ մազեր ունեցողները կարող է չնկատեն տարբերությունը, իսկ մյուսերը չեն խուսափի մազերը ցաքուցրիվ լինելուց: Չորացրո՛ւ մազերդ ամբողջությամբ և դրանց վրա տարածի՛ր չլվացվող խնամք: Փայլուն խոպոպներով արթնանալու համար գերադասելի է հատուկ գիշերային խնամքը:
5. Պահպանի՛ր ծավալը
Գիշերվա ընթացքում մազերը ճմրթվում են: Երեկոյան չորացումից հետո ստացվող շքեղ ծավալից հետք անգամ չի մնում: Բավակա՛ն է դրան դիմանալ: Մազերդ կապի՛ր գլխի գագաթին, իսկ առավոտյան բաց թող: Ծավալը կպահպանվի: Կարևորը չափազանց ձիգ չկապելն է՝ գլխամաշկի արյան շրջանառությունը չխախտելու համար: Ռեզինե կապիչի փոխարեն նախընտրի՛ր կտորից պատրաստվածը, կամ փոքրիկ, մետաքսե թաշկինակը: Ուզո՞ւմ ես ծավալուն խոպոպներ՝ առանց տաք հարդարման: Գիշերվա համար ազատ հյուսքեր արա: Եթե պլանավորում ես չոր շամպուն օգտագործել, դա ևս ավելի լավ է անել գիշերվա համար: Այն կկլանի ավելորդ սեբումն ու քրտինքը, և դու կարթնանաս թարմ մազարմատներով:
