Պատմեք, թե ինչպես եք ծանոթացել:
Նատալյա. 2010 թվականին մեզ ծանոթացրեց ընդհանուր ընկերը: Իմ ծանոթ լուսանկարիչն ասաց, որ հանդիպման կգա ընկերոջ հետ, չեմ ասի, թե այդ ժամանակ շատ ուրախացա այդ առիթով (ծիծաղում է):
Մուրադ. հետո շատ երկար փորձում էի ընկերոջիցս վերցնել նրա համարը, բայց արդյունքում ստիպված եղա փնտրել սոցցանցում: Այդ ժամանակ էլ պարզվեց, որ մենք ապրում ենք հարևան տներում: Ամեն առավոտ հեծանվով դուրս էի գալիս փողոց՝ ձևացնելով, թե պատրաստվում եմ սպորտով զբաղվել, իսկ իրականում պարզապես Նատաշային նկար էի նետում և հրավիրում էի միանալ զբոսանքին: Պատասխան չստանալու դեպքում գնում էի քնելու:
Հիշո՞ւմ եք ձեր առաջին համատեղ ճանապարհորդությունը:
Մուրադ. 2011 թվականին տեղի ունեցավ մեր առաջին համատեղ ճանապարհորդությունը, Նատաշան եկավ նկարահանումների ինձ մոտ՝ Բարսելոնա: Աշխատանքից հետո գնացինք քաղաքով զբոսանքի, լուսանկարվեցինք՝ ինչպես սովորական զբոսաշրջիկներ: Փորձարկումների ընթացքում «Follow Me» դիրքն ու ոճը ինքնըստինքյան ստացվեց, այդ ամենը շատ տպավորիչ էր, այնպես որ մենք շարունակում էինք այս հնարքն օգտագործել և նոր կադրեր փնտրել:
Ե՞րբ ծագեց ճանապարհորդությունների մասին բլոգ սկսելու միտքը:
Մուրադ. Իսպանիայից Մոսկվա վերադարձին իմ անձնական Instagram էջը վերածեցինք թեմատիկ ֆոտո-բլոգի #FollowMeTo: Այդ ժամանակ միտումը դեռ նոր էր զարգանում, այնպես որ մենք առաջնեկ-բլոգերներից մեկն էինք, հատկապես Ռուսաստանում: Ուր էլ գնայինք հանգստանալու, նկարահանում էինք նոր ոճով, այդպես էլ ամեն ինչ սկսվեց: Մեկուկես տարի անցավ, նախքան էջը համընդհանուր հռչակ ձեռք բերեց: Հաջողակ բլոգի երեք հիմքերը՝ շարունակականություն, համբերություն և հավատ սեփական գաղափարի հանդեպ:
Կարո՞ղ եք ասել, թե ձեզ համար ճանապարհորդությունները վերածվել են աշխատանքի, թ՞ե շարունակում եք հաճույք ստանալ ընթացքից:
Մուրադ. սովորաբար ճանապարհորդությունը տևում է 2 շաբաթ: Նախանձում ենք նրանց, ովքեր կարող են մեկ ամսով գնալ Ամերիկա կամ կես տարով՝ Ասիա: Կողքից կարող է թվալ, թե մենք ունենք երազանքի աշխատանք, բայց նկարահանումը ծանր գործընթաց է: Մենք միշտ փորձում ենք ընդմիջումներ անել, որպեսզի պարզապես վայելենք նոր քաղաքը կամ երկիրը, նախաճաշերի համար փնտրում ենք հետաքրքիր տեղեր, հիանալի տեսարաններով ռոմանտիկ տանիքներ:
Նատալյա. եթե ճանապարհորդությունները մեզ համար սովորական դառնային, #FollowMeTo» նախագիծն այլևս չէր լինի: Բացի այդ, դեռ այնքան տեղեր կան, ուր չենք եղել:
Ի՞նչ նոր վայրերի մասին եք երազում:
Մուրադ. այդպիսի սովորություն կա՝ աշխարհագրորեն մոտ երկրները թողնել հետո, իսկ առաջին հերթին մեկնել հեռավոր ափեր: Բայց այս տարի մեզ համար իսկական բացահայտում էր Հունաստանը: Հաջորդ նշանակետը սկանդինավյան երկրներն են:
Ի՞նչ կարելի է գտնել ձեր ճանապարհորդական հարդարանքի պայուսակում:
Նատալյա. ես հետս ինքնաթիռ եմ վերցնում կոպերի բարձիկներ և գործվածքային դիմակներ, օգտագործում եմ թուլացնող բուրավետ յուղեր, շատ ջուր եմ խմում ջրազրկումից խուսափելու համար: Երբեմն մեկ ամսում մենք փոխում ենք 5 երկիր՝ տարբեր կլիմաներով և ժամային գոտիներով, սա մեծ սթրես է օրգանիզմի համար: Այդ պատճառով ես շատ ուշադիր եմ մաշկիս ու մազերիս խնամքի հանդեպ, յոգա ու մեդիտացիա եմ անում: Երբ Մոսկվա եմ վերադառնում, գնում եմ բաղնիք, դա իմ փրկօղակն է:
Նոր տարին դիմավորելու կատարյալ վայրը:
Նատալյա. մենք Նոր տարին տարբեր երկրներում ենք նշել, բայց մեզ համար այս տոնը շարունակում է մնալ ընտանեկան: Պետք է լինի ձյուն, օլիվյե, հրավառություն, շամպայն և մտերիմ մարդիկ: Այս տարի շատ ենք ուզում Նոր տարին դիմավորել Մոսկվայում, իսկ հետո՝ հունվարի 1-2-ին, մեկնել որևէ տաք երկիր:
Մուրադ. կամ պարզապես կարելի է վերցնել ընկերներին ու մեկնել հեքիաթային ձմեռային Լապլանդիա:
